चितवन । चितवनमा जर्बजस्ती बन्द गराउँदै हिडेका नेत्रविक्रम चन्द ‘विप्लव’ नेतृत्वको नेकपाका ११ कार्यकर्तालाई प्रहरीले पक्राउ गरेको छ ।

पेट्रोलियमपदार्थमा भएको मुल्यवृद्धिको विरोधमा आयोजना गरिएको बन्द कार्यक्रममा सहभागी विप्लवका समूहका ११ कार्यकर्ता चितवनबाट पक्राउ परेका हुन् ।

प्रहरीले विप्लवका चितवन जिल्ला इन्चार्ज सन्देश पौडेलसहित एघार कार्यकर्तालाई गिरफ्तार गरेको नेकपा चितवन विशेष जिल्ला सेक्रेटरी विश्वनाथ चौधरी ‘महेश’ले जानकारी दिए ।

बन्दका कारण चितवनमा विहानैदेखि सार्वजनिक सवारी साधनहरु सञ्चालन भएका छैनन् ।

चितवनको मुख्य बजार क्षेत्र नारायणघाट पूर्णतया बन्द रहेको छ भने जिल्लामा विद्यालय, उद्योग कलकारखाना पनि सञ्चालन भएका छैनन् ।
मुख्य राजमार्गमा हलुवा सवारी साधन तथा निजी गाडीहरु सञ्चालन भएका छन् ।

उता, नवलपरासीपूर्वमा पनि विप्लवका कार्यकर्ताले अबरोध गरेका छन् । नवलपुरको कावासोती तथा प्रगतिनगर क्षेत्रमा राजमार्गमा टायर बालेर बाटो अवरुद्ध पारिएको छ ।

लामो दूरीका सवारी साधन तथा मालबाहक ट्रकहरुलाई राजमार्गमा प्रहरीले स्कर्टिङ गरेर सञ्चालन गराएको छ ।