काठमाडौँ । अमेरिकी सहायक विदेशमन्त्री डोनाल्ड लु नेपाल भ्रमणमा आउँदैछन् । दक्षिण तथा मध्य-एसियाली मामिला हेर्ने अमेरिकी सहायक विदेशमन्त्री लु बुधबार साँझ काठमाडौँ आउन लागेका हुन् ।

अमेरिकी राष्ट्रपति जो बाइडेनले कार्यभार सम्हालेयता पहिलोपटक उच्चस्तरीय अमेरिकी अधिकारी नेपाल आउन लागेका हुन् । नेपालमा रहँदा उनले प्रधानमन्त्री शेरबहादुर देउवा लगाएतका नेताहरुसँग भेटघाट गर्ने छन् । माल्दिभ्सको राजधानी मालेबाट आज अपरान्ह काठमाडौं अवतरण गर्ने अमेरिकी दूतावासले जनाएको छ ।

अमेरिकी अनुदान सम्झौता (एमसीसी)संसदबाट अनुमोदन हुन नसकेका बेला उनी नेपाल आउन लागेका हुन् । सन् २०१७ मा हस्ताक्षर भएको एमसीसी नेपालको संसदबाट अनुमोदन हुन सकेको छैन । गत सेप्टेम्बर ९ मा नेपाल आएकी एमसीसी उपाध्यक्ष फतिमा सुमारले एमसीसीलाई छिटो पास गर्न नेपालका नेताहरुलाई दबाब दिएकी थिइन् ।