काठमाडौँ । नेकपा एमालेको १०औँ राष्ट्रिय महाधिवेशनको पूर्वसन्ध्यामा पार्टीको केन्द्रीय प्रचार विभागले ‘नवयुग’ पत्रिकाको दैनिक इ–बुलेटिन प्रकाशनलगायत कार्यक्रम अघि सारेको छ । ‘नवयुग’ एमालेको आधिकारिक मुखपत्र हो ।

विशेष बुलेटिनमा पार्टीका शीर्ष नेताका अन्तर्वार्ता, लेख, विचार, महाधिवेशन केन्द्रित गतिविधि समेटेर महाधिवेशन अवधिभर हरेक दिन साँझ प्रकाशन हुने विभागका उपप्रमुख सूर्य थापाले जानकारी दिए । एमालेले पार्टीको आधिकारिक फेसबुकबाट दैनिक शीर्ष नेताको प्रत्यक्ष भिडियो अन्तर्वार्तासमेत सुरुवात गरेको छ ।

यस्तै, विभिन्न क्षेत्रका विशिष्ट व्यक्तित्व र कलाकारबाट महाधिवेशनलाई प्राप्त भिडियो सन्देशको प्रसारण गर्दै आएको छ । केन्द्रीय सदस्य थापाले प्रचारकै क्रममा यही मंसिर ७ गते युवा संघ नेपाल, अनेरास्ववियु, खेलकुद महासंघलगायत संगठनको आह्वानमा काठमाडौँबाट चितवनसम्म र देशैभरि मोटरसाइकल र्‍याली गरिने जनाएका छन् ।

यसैगरी पार्टीका संस्थापक महासचिव पुष्पलाल, जननेता एवं तत्कालीन महासचिव मदनकुमार भण्डारी र तत्कालीन अध्यक्ष मनमोहन अधिकारीको जीवनी र योगदानमा आधारित भिडियो निर्माण गरिने भएको छ । साथै विभागले देशका महत्वपूर्ण स्थानमा प्रचारका डिजिटल डिस्प्ले, बोर्ड राख्ने तथा पार्टीका अध्यक्ष केपी शर्मा ओलीसँग वरिष्ठ पत्रकार तथा बुद्धिजीवीसँग अन्तक्रिया गर्नेलगगायत योजना तय गरेको छ ।

एमालेले सचिव एवं प्रचार विभागका प्रमुख योगेश भट्टराईको संयोजत्वमा महाधिवेशन प्रचार समिति गठन गरेको छ । एमालेको महाधिवेशन यही म‌सिर १० देखि १२ गतेसम्म चितवनामा हुँदै छ ।