काठमाडौँ । नेकपा एमालेको १० औँ महाधिवेशनको दोस्रो दिन आज नेतृत्व चयन गर्न बन्दसत्र सुरु हुने भएको छ । चितवनको नारायणी नदी किनारमा शुक्रबार उद्घाटन भएको महाधिवेशनको बन्दसत्र सौराहास्थित होटल सेभेनमा हुने भएको हो ।

अधिवेशनका प्रचार विभाग प्रमुख योगेश भट्टराईले शनिबार बिहान १० बजेदेखि बन्दसत्र सुरु हुने जानकारी दिएका हुन् । बन्दसत्रको उद्घाटन कार्यक्रममा पार्टी अध्यक्ष केपी शर्मा ओली र विदेशी पाहुनाहरूले सम्बोधन गर्ने भएका छन् ।

एमाले महाधिवेशनका लागि भारत, बंगलादेश, श्रीलंकालगायत देशबाट विदेशी प्रतिनिधि नेताहरू सहभागी भएका छन् । बन्दसत्रबाट नयाँ नेतृत्व चयन हुनेछ । महाधिवेशन भोलि आइतबारसम्म चल्ने छ ।