काठमाडौँ । नेकपा एमालेका उपाध्यक्ष भिम रावलले कसैले टीका लगाएर पद दिँदैमा नेता बन्न नसक्ने बताएका छन् । जारी १० औँ महाधिवेशनमा अध्यक्ष पदका लागि उम्मेदवारी दिएपछि पत्रकारसँग कुरा गर्दै उनले यस्तो बताएका हुन् ।

पार्टी अध्यक्ष केपी शर्मा ओलीले आज बिहान ३ बजे १९ सदस्यीय पदाधिकारी र ३०१ जना केन्द्रीय कमिटीको नामावली पेश गरेका थिए । यसप्रति लक्षित गर्दै उपाध्यक्ष रावलले भने, ‘आफूले इच्छा लागेको पदमा मनोनय पत्र दाखिला गर्न पाउनु पर्छ, हाम्रो पार्टीमा कुनै व्यक्तिले सूची प्रस्तुत गरेर नेता हुने प्रचलन होइन ।’

उनले पार्टीको विधि पद्दतिलाई बलियो बनाउन पहिलेदेखि नै अध्यक्ष पदमा उम्मेदवारी दिने घोषणा गरेको बताए । उनले अहिले पार्टीका समूह भन्ने कुरा नभएकाले एक्लै अध्यक्ष पदमा उम्मेदवारी दिएको बताएका थिए ।