काठमाडौं । एनएमबि बैंक लिमिटेड एशियाकै उत्कृष्ट बैंक बन्न सफल भएको छ । एनएमबि बैंक एसियाकै सर्वोत्कृष्ट बैंकको रुपमा पुरस्कृत भएको बैंकको प्रमुख कार्यकारी अधिकृत (सीईओ) सुनील केसीले जानकारी दिए ।

नेपाली बैंकिङ इतिहासमै पहिलोपटक एनएमबि बैंकले ‘बैंक अफ दि इयर एशिया २०२१’ अवार्ड हात पार्न सफल भएको छ ।
सबैको मेहनत र विश्वासले बैंकले यो अवार्ड पाउन सफल भएको सीईओ केसीले बताए ।

बेलायतको लन्डनबाट प्रकाशित हुने प्रसिद्ध म्यागजिन दि बैंकरको निर्णायक मण्डलले एनएमबि बैंकलाई छनोट गरेको हो ।
एशियाका ४८ देशका बैंकहरु यस अवार्डको प्रतिष्पर्धामा सहभागी थिए ।

‘बैंक अफ दि इयर अवार्ड’ सन् २००२ मा स्थापित भएको थियो । यो अवार्ड प्रत्येक देशको सर्वोत्कृष्ट बैंक तथा पश्चिमी युरोप, मध्यपूर्वी युरोप, एसिया अमेरिका, मध्यपूर्व र अफ्रिका गरी ६ वटा महादेशभरिकै सर्वोत्कृष्ट बैंकहरुलाई प्रदान गरिँदै आएको छ ।

उक्त उपाधि बैंकका अध्यक्ष, सञ्चालक समितिका सदस्यहरु तथा एनएमबिका प्रमुख कार्यकारी अधिकृतको उपस्थितिमा प्रधानमन्त्री शेरबहादुर देउवाले पुरस्कार प्रदान गरेका थिए ।