काठमाडौँ । अन्तर्राष्ट्रिय स्तरको अनुभवसहित नेपाली मौलिकपनलाई मिसाएर बनाइएको खुकुरी रमको नयाँ प्याकेजिङको आकर्षकले ग्राहकको ध्यान तानेको छ । करिब ६ दशकदेखि उपभोग गरिरहेका ग्राहकहरूले नयाँ प्याकेजिङको विषयमा उत्साहजनक प्रतिक्रिया दिइरहेका बिक्रेताहरुले जनाएको छ ।

नयाँ प्याकेजिङमा नेपालको मौलिकतासहित नवीन र पृथक विशेषताहरु थपिएका छन् । ‘द नेपाल डिस्टिलरिज’का महाप्रबन्धक सुभास लामिछानेका अनुसार रमको नयाँ बोटलको बिर्कोले नेपाली वीरताको प्रतीक खुकुरीको बिँडको अनुभूति दिएको छ ।

रमको नयाँ प्याकमा रातो घेरामा अंकित सगरमाथाको शिखर, शिखरमा उदाएको सूर्य र सूर्यको अगाडि रहेको गोर्खालीहरुको शक्तिको प्रतीक खुकुरीले नेपाली मौलिकता र सम्पदालाई दर्शाउने उनले बताए । यस्तै, स्वदेशी नेपाली मास्टर ब्लेन्डरको हस्ताक्षरयुक्त यो प्याकेजिङले स्वदेशी तथा विदेशी उपभोक्ताहरुलाई नेपाली मौलिकता तथा गुणस्तर दिने भएको छ ।

खुकुरी रमको नयाँ प्याकका विशेषताका कारण ग्राहकहरु उत्साहित देखिएका बिक्रेताहरुले बताएका छन् । उनीहरुले खुकुरी रमले नयाँ प्याकमा पृथक प्रयोग गरेर आफ्ना ग्राहकहरुका लागि यसलाई अझ विशेष बनाउने काम गरेको बताउँछन् ।

उनका अनुसार नयाँ प्याकमा समेत खुकुरी रमको उही पुरानै उत्कृष्ट स्वाद कायमै राखिएको छ । यसको गुणस्तरीयता र रम पिउँदा हुने अनुभूतिमा कुनै फरकपना नआओस् भन्ने विषयलाई विशेष रुपमा ध्यान दिइएको उल्लेख गरे ।