काठमाडौँ । सिटिजन्स बैंक इन्टरनेशनल लि.को लघुवित्त परियोजनाअन्तर्गत शाखा कार्यालय तौलिहवाका ग्राहक सब्रुन निशाको मृत्यु भएसँगै उनका श्रीमान् जब्बर अली तेलीलाई नगद हस्तान्तरण गरेको छ । बैंकले उनलाई तीन लाख ६५ हजार रुपैयाँ हस्तान्तरण गरेको हो ।

यस्तै, अर्का ग्राहक फूलमती कोरीको मृत्यु भएसँगै उनका छोरा रामचन्द्र कोरीलाई चार लाख ५४ हजार रुपैयाँ हस्तान्तरण गरेको छ । उक्त रकम बैंकका प्रमुख कार्यकारी अधिकृत गणेशराज पोखरेलले हस्तान्तरण गरेका हुन् ।

एक कार्यक्रमका बीच हस्तान्तरण गरिएको उक्त रकम लघुवित्त परियोजनामा आवद्ध ऋणीहरुको अनिवार्य जीवन बिमावापत मृतकको परिवारलाई दिने गरेको छ । बैंकले दुई वटा प्रदेशका २१ वटा शाखा कार्यालयको लघुवित्त इकाईमार्फत करिब १४ हजार विपन्न महिलालाई लघुवित्त बैंकिङ्ग सेवा प्रदान गर्दै आएको छ ।

बैंकले देशभर फैलिएका एक सय ७४ शाखा, एक सय २३ वटा ए.टि.एम. र एक सय १४ वटा शाखारहित बैंकिङ्ग इकाईबाट करिब १२ लाख ५० हजार ग्राहकवर्गलाई सेवा दिँदै आएको छ ।