काठमाडौँ । नेकपा माओवादी केन्द्रले आज प्रदेश सम्मेलन गर्ने भएको छ । पार्टीले सात भौगोलिक र तीन गैर भौगोलिक गरी १० प्रदेशमा सम्मेलन गर्ने भएको हो ।

अधिवेशन दिउँसो १ बजे पार्टी अध्यक्ष पुष्पकमल दाहाल ‘प्रचण्ड’ले भर्चुअल माध्यमबाट उद्घाटन गर्ने भएका छन् । पार्टीले सात भौगोलिकसहित उपत्यका विशेष, सम्पर्क समन्वय र प्रवास प्रदेश समिति गठन गरी १० प्रदेशमा अधिवेशन गर्ने भएको हो ।

प्रदेश १ को विराटनगर, प्रदेश २ को जनकपुर, वागमतीको काठमाडौं, गण्डकीको पोखरा, लुम्बिनीको भालुवाङ, कर्णालीको सुर्खेत र सुदूरपश्चिम प्रदेशको धनगढीमा सम्मेलन हुँदै छ । विशेष र सम्पर्क समितिले अनुकूलमा सम्मेलन गर्ने र प्रवास समितिको सम्मेलन आज नभई छिट्टै हुने पार्टी कार्यालयले जनाएको छ ।

सम्मेलनबाट नौ पदाधिकारीसहित समिति चयन गर्ने छ । प्रदेश समिति एक अध्यक्ष, तीन उपाध्यक्ष, एक सचिव, तीन सहसचिव र एक कोषाध्यक्षसहित सदस्यहरू हुने व्यवस्था रहेको छ ।

माओवादीले यसअघि गत ११ गते पालिका सम्मेलन गरेको थियो ।