काठमाडौं । विश्वव्यापी महामारीका रूपमा फैलिएको कोरोना भाइरस (कोभिड १९) का कारण मानसिक समस्या बढ्दै गएको मनोविद्हरुले बताएका छन् ।
मनोविद् डा.नरेन्द्रसिंह ठगुन्नाले कोभिड–१९ ले रोजगारी अभाव, आर्थिक समस्या, घरेलु हिंसा तथा आघातजन्य घटनाका कारण मानिसमा चिन्ता, तनाव र डिप्रेशनलगायत मनोवैज्ञानिक असर बढ्न थालेको बताए ।
मनोविद् करुणा कुवरका अनुसार कोरोना संक्रमणका कारण मानिसमा निन्द्रा नलाग्ने, खान मननलाग्ने एकदमै डर लाग्ने लगायतका मानसिक समस्या देखिएको बताईन् ।
मनोविश्लेषक वासु आचार्यले कोरोना त्रासले जीवन असामान्य भएमा मनोविद्सँग परामर्श लिन सकिने र आवश्यक परे केही समयका लागि औषधि खानुपर्ने जानकारी दिए ।
बेलायतको माइन्ड नामक मानसिक स्वास्थ्य संस्थाले यस्तो बेला मानिसलाई प्रकृतिमा रमाउने, धेरै समय घाममा बस्न, व्यायाम गर्न, राम्रो आहारविहार गर्न र पर्याप्त पानी पिइरहन सुझाव दिएको छ ।