धादिङ । कोरोना भाइरसको संक्रमण बढेको भन्दै सरकारले विभिन्न जिल्लामा निषेधाज्ञा जारी राखेको छ । निषेधाज्ञा जारी रहेका जिल्लाहरुमा पनि निषेधाज्ञाको क्रममा कुनै सभा समारोह तथा कार्यक्रम नगर्न मापदण्ड बनाइएको छ ।

तर धादिङको सिद्धलेक गाँउपालिकाका जनप्रतिनिधिहरुले भने जिल्लाले बनाएको मापदण्डकै बर्खिलाप पार्टी कार्यालय उद्घाटन गरेका छन् । शनिबार, नेकपा एमाले ओली समूहका जिल्ला तहका नेता समेत रहेका गाउँपालिका अध्यक्ष प्रेमनाथ सिलवाल, उपाध्यक्ष तथा गाउँपालिका उपाध्यक्ष कमला शर्मा, गाउँपालिकाका ओली समूह निकटका वडाध्यक्ष, स्थानिय नेता तथा सयौँ कार्यकर्ताहरुको उपस्थितिमा एक कार्यक्रम गरी जिल्ला समन्वय समितिका प्रमुख जगन्नाथ नेपालबाट गाउँपालिका कार्यालय नजिकै पार्टी कार्यालयको उद्घाटन गरेका हुन् ।

केहि समयअघि मात्र एमालेको ओली समूहले सिद्धलेकमा गाउँपालिका उपाध्यक्ष कमला शर्माको अध्यक्षतामा पार्टी कमिटी घोषणा गरेको थियो । उक्त कमिटीले शनिबार गाउँपालिकाको खर्चमा एक औपचारिक कार्यक्रम गरी पालिका नजिकैको एक घरमा पार्टी कार्यालय स्थापना गरेको हो ।

पार्टी कार्यालयको उध्घाटन कार्यक्रममा ओली समूहका जनप्रतिनिधिले वडावडाबाट कार्यकर्ता भेला गराएका थिए ।