काठमाडौं । काठमाडौंमा कोरोना संक्रमितको उपचारमा अक्सिजनको अभाव भएपछि गृह मन्त्रालयको पहलमा ६० सिलिण्डर अक्सिजन ग्यास काठमाडौं ल्याइएको छ ।

सुनसरी जिल्लाबाट सेनाको स्काइट्रकमा ६० सिलिण्डर अक्सिजन काठमाडौं ल्याइएको गृह मन्त्रालयले जनाएको छ ।

देशभरीबाट संकलन गरिएको अक्सिजन सिलिण्डर कोभिड–१९ संकट व्यवस्थापन केन्द्र (सिसिएमसी)मार्फत वितरणको व्यवस्था मिलाइएको छ ।

कोरोना संक्रमितको उपचारमा अक्सिजनको कमी हुन नदिन हरसम्भव प्रयास भइरहेको जनाउँदै गृह मन्त्रालयले अस्पतालबाहेक अन्य प्रयोजनमा रहेका अक्सिजन सिलिण्डर सरकारलाई बुझाउन पनि गृह मन्त्रालयले अनुरोध गरेको छ ।