सुनसरी । जिल्लाको धरान उपमहानगरपालिका २ स्थित सडकबाट एम्बुलेन्समा ल्याउँदै गरेको सय किलो अवैध लागु औषध गाँजासहित २ जना पक्राउ परेका छन् ।

सोमबार साँझ प्रहरीले एम्बुलेन्स चालक धरान उपमहानगरपालिका १५ बस्ने ३६ वर्षीय बल बहादुर लिम्बु र सोही उपमहानगरपालिका ११ बस्ने धनकुटा सहिदभूमि गाउँपालिका १ घर भएका २८ वर्षीय पोशन राईलाई पक्राउ गरेका हुन् ।

धनकुटा भेडेटारबाट धरानतर्फ आउँदै गरेको को १ च ५५५९ नम्बरको एम्बुलेन्सलाई प्रहरीले जाँच गर्ने क्रममा पछाडिको भागमा ४ वटा झोलामा रहेको उक्त परिमाणको गाँजासहित फेला पारेको इलाका प्रहरी कार्यालय धरानले जनाएको छ ।

पक्राउ परेका उनीहरुविरुद्ध लागु औषध मुद्दामा थप अनुसन्धान भइरहेको प्रहरी कार्यालय धरानले जनाएको छ ।