काठमाडाैं । ललितानिवास जग्गा प्रकरणमा फरार रहेका नेपाली कांग्रेसका उपसभापति विजयकुमार गच्छदार १० लाख धराैटी बुझाएर रिहा भएका छन् ।

बालुवाटारस्थित ललितानिवासकाे जग्गा हिनामिनासम्बन्धी प्रकरणा अख्तियार दुरूपयाेग अनुसन्धान आयाेगले विशेष अदालतमा मुद्दा दायर गरेपछि गच्छदार फरार रहेका थिए । कांग्रेसकाे नेतृत्वमा सरकार बनेसँगै उनी बयान दिन उनी अदालत पुगेकाे हुन् ।

उनी आज विशेष अदालतमा सशरीर उपस्थित भएर १० लाख धराैटी बुझाएर रिहा भएका हुन् । उनले बिहान १० बजे नै विशेष अदालत पुगेर बयान दिएका थिए । २०६६ सालमा माधवकुमार नेपाल नेतृत्वकाे सरकारमा भाैतिक याेजना तथा निर्माण मन्त्री हुँदा ललिता निवासकाे जग्गा हिनामिना भएकाे उनीमाथि आराेप लागेकाे छ ।

आयोगले ललितानिवास जग्गा प्रकरणमा १७५ जनाविरुद्ध विशेष अदालतमा भ्रष्टाचारको मुद्दा दायर गरेको थियो । अख्तियारले गच्छदारविरूद्ध ९ करोड ६५ लाख ७६ हजार रुपैयाँ बिगो मागदाबी गर्दै विशेष अदालतमा मुद्दा दायर गरेको थियाे ।