काठमाडौं । सर्वोच्च अदालतले आजबाट पूर्णरुपमा सेवा दिने जनाएको छ । गत १ साउनमै विज्ञप्ती जारी गर्दै सर्वोच्चले १५ गत्तेबाट सबै सेवा सुचारु गरिने बताएको थियो ।

कोरोना महामारीका कारण सेवा संकुचित गरेको तीन महिनापछि सर्वोच्चले सबै प्रकारका सेवाहरु यसरी नियमित रुपमा सञ्चालन गर्ने भएको हो । ३१ असारमा बसेको सर्वोच्चको पूर्ण बैठकले यस्तो निर्णय गरेको सर्वोच्चका प्रवक्ता बाबुराम दाहालले बताए ।

‘।।सर्वोच्च अदालतबाट सम्पादन हुने काम कारवाही र सेवा प्रवाहका सम्बन्धमा मिति २०७८÷०१÷१४ तथा तत्पश्चात् विभिन्न मितिमा बसेको पूर्ण बैठकबाट आवश्यक निर्णयहरु भइ सो अनुरुपको व्यवस्थापन हुँदै आएकोमा २०७८÷०४÷१५ देखि स्वास्थ्य सुरक्षासम्बन्धि निर्धारित सम्पूर्ण मापदण्डहरुको पूर्णपालना हुनेगरी यस अदालतबाट प्रवाह गरिने सबैप्रकारका (दर्ता र सुनुवाइसम्बन्धि) सेवाहरु नियमित रुपमा सञ्चालन गर्ने,’ पूर्णबैठकबाट भएको निर्णयबारे जारी गरिएको विज्ञप्तीमा भनिएको छ ।

अदालतले सेवा संकुचन गरेको अवधिभित्रको हदम्याद, म्याद र तारेख गत वर्ष १५ जेठमा गरेको आदेशअनुसार हुने जनाएको छ । अर्थात् यस अवधिमा हदम्याद लाग्ने छैन भने म्याद र तारेख गुज्रिएको मानिने छैन ।

नेपालमा कोभिडको दोस्रो लहर सुरु भएसँगै सर्वोच्चले आफ्नो सेवामा सीमितता ल्याएको थियो । सर्वोच्चसँगै अन्य अदालतहरुले पनि संक्रमण फैलन नदिन विभिन्न किसिमका सेवा बन्द गरेका थिए ।