काठमाडौँ । काठमाडौँ महानगरपालिका–१४ कलंकीबाट खसीको मासु भन्दै बाख्राको मासु बेच्ने ४ जना पक्राउ परेका छन् । प्रहरीले भारत बिहार घर भई कलंकी खसी बजार बस्ने ६७ वर्षीय गुलाम रसोल क्रोसिल, २५ वर्षीय जविर क्रोसिल, २१ वर्षीय जाविर क्रोसिल र ५० वर्षीय मटान पुरेसीलाई पक्राउ गरेको हो ।

शनिबार बिहान ५ बजे खसी बजारमा जिउँदो खसी बेच्ने पसलमा बाख्राको पहिचान खुल्ने अंगहरु लुकाएर मासु बेच्दै गरेको अवस्थामा उनीहरुलाई पक्राउ गरिएको प्रहरीले जनाएको छ । प्रहरीका अनुसार पक्राउ पर्नेले बिक्रीका लागि राखिएको खसीको मासुमा बाख्राका पहिचान खुल्ने अंग लुकाएर बाख्रीको मासु मिसाएर बेच्दै आएका थिए ।

प्रहरीले बिक्रीका लागि राखिएको १५ वटा बाख्रा, बाख्राको अंग लुकाएर बेच्न राखिएको मासुसमेत बरामद गरेको प्रहरीले जनाएको छ ।