काठमाडौं । नेकपा एमालेको केन्द्रीय कमिटी बैठक सुरु भएको छ । सोमबार ललितपुरको च्यासलस्थित तुल्सीलाल स्मृति प्रतिष्ठानमा एमाले वरिष्ठ नेता माधव कुमार नेपाल पक्षको सहभागिता बिना बैठक सुरु भएको छ ।

यसअघि आजै बसेको स्थायी कमिटी बैठकले विधान संशोधन प्रस्ताव पारित गरेको थियो । एमालेले आगामी भदौ २७ र २८ गते विधान महाधिवेशन बोलाउने निर्णय गरेको थियो । त्यसैको तयारीका लागि एमालेले विधान संशोधन प्रस्ताव ल्याएको हो ।

केन्द्रीय कमिटी बैठकमा पार्टी अध्यक्ष केपी शर्मा ओली विधान संशोधन प्रस्तावसहित राजनीति प्रतिवेदन र महासचिव ईश्वर पोखरेलले सांगठनिक प्रस्ताव पेश गर्नेछन् । उक्त प्रतिवेदनमाथि बैठकमा खुला छलफल हुने बताइएको छ ।