काठमाडौँ । प्रमुख प्रतिपक्ष दल नेकपा एमालेले महाकाली नदीमा बेपत्ता भएका जयसिंह धामीलाई न्याय दिलाउनमा सरकारले लाचारी देखाएको बताएको छ ।

बिहीबार एमालेले विज्ञप्ती जारी गर्दै महाकाली नदी तर्ने क्रममा भारतीय सीमा सुरक्षा बलका सुरक्षाकर्मीले तुइन चुँडाइदिएर बेपत्ता भएको एक महिना बित्दा पनि धामीलाई न्याय दिलाउन नसकेको भन्दै आपत्ति जनाएको हो । पार्टी प्रवक्ता प्रवक्ता प्रदीप ज्ञवालीले जारी गरेको विज्ञप्तीमा उक्त गठनको छानबिन गर्न गठित समितिले ढिलो गरी प्रतिवेदन बुझाए पनि अस्पष्ट रहेको भन्दै एमालेले सरकारले यो घटनालाई थामुथुम गर्न लागेको बताएको छ ।

विज्ञप्तीमा भनिएको छ, ‘आफ्ना नागरिक बेपत्ता पारिएको यति संवेदनशील घटनाका सम्बन्धमा भारतीय पक्षसँग जानकारी लिने, सोधपुछ गर्ने र आपत्ति जनाउने सामान्य औपचारिकता र कूटनीतिक पहल गर्न नसक्ने सरकारले नेपाली जनताको ध्यान यस घटनाबाट अन्यत्रै मोड्न खोजेको आशङ्का पैदा भएको छ ।’ एमालेले सरकारको लाचारीप्रति खेद व्यक्त गर्दै सत्यतथ्य सार्वजनिक गरी दोषीलाई कारबाही र पीडित परिवारलाई न्याय दिन माग गरेको छ ।