काठमाडौँ । नेपाली कांग्रेस शुक्रबार (आज)देखि १४ औँ महाधिवेशनमा होमिएको छ । क्रियाशिल सदस्यता नामावली पार्टीको वेव साइटमार्फत सार्वजनिक गरेका ५६ जिल्लाहरूमा आजदेखि महाधिवेशन सुरु भएको हो ।

गत साउन ३० गते प्रधानमन्त्री तथा पार्टी सभापति शेर बहादुर देउवा निवास बुढानीलकण्ठमा बसेको केन्द्रीय कार्य समिति बैठकले भदौ १८ गते वडा अधिवेशन गर्ने निर्णय गरेको थियो । सोही निर्णयअनुसार आजदेखि आगामी २७ गतेसम्म वडा अधिवेशन सम्पन्न गर्नु पर्ने छ ।

कांग्रेस सभापति देउवा र वरिष्ठ नेता रामचन्द्र पौडेलबीच यसअघि ७७ वटै जिल्लाका ६ हजार ७ सय ४३ वडाहरूमा अधिवेशन एकसाथ सुरु गर्ने सम्झदारी गरेका थिए । शुक्रबारसम्म पार्टीले ५६ जिल्लाको मात्र नामावली सार्वजनिक गरेको छ भने अझै २१ जिल्लामा क्रियाशील विवाद समाधान नहुँदा नामावली सार्वजनिक रोकिएको छ ।

कांग्रेसको केन्द्रीय निर्वाचन समितिले नामावली सार्वजनिक भएका ५६ जिल्लाहरूका केन्द्रबाट अधिवेशनका लागि निर्वाचन अधिकृतहरू खटाएको छ । त्यसमध्ये आज ४५ जिल्लामा मात्रै वडा अधिवेशन सम्पन्न हुने अनुमान समितिको छ । आज ४० भन्दामाथि ४५ भन्दा कम जिल्लामा वडा अधिवेशन हुने निर्वाचन समितिका सदस्य गोपाल कृष्ण घिमिरेले जानकारी दिए ।

उनका अनुसार ५६ जिल्लामा निर्वाचन अधिकृत खटाइएको छ । १० जिल्लाले शनिबार र आइतबार मात्र अधिवेशन गर्ने जानकारी दिएका उनले बताए ।

केन्द्रीय निर्वाचन समितिका संयोजक वरिष्ठ अधिवक्ता महादेवप्रसाद यादवले निर्वाचन अधिकृत खटाइएका जिल्लाहरूमा निर्वाचनका लागि आवश्यक सामग्रीसमेत पठाइसकिएको जानकारी दिए । उनले भने, “क्रियाशील नामावली सार्वजनिक भएका ५६ जिल्लामा निर्वाचनमा चाहिने आवश्यक सामाग्रीहरू पठाइसेको छ ।”

कांग्रेसका यी क्रियाशील सदस्यहरू पार्टीको वडा अधिवेशनका मतदाता हुन् । क्रियाशील सदस्यको संख्या करिब ९ लाखको नजिक रहेका छन् ।

यसरी हुन्छ वडा कार्य समितिको गठन

गाउँपालिका वडा अधिवेशनले वडाका क्रियाशील सदस्यहरूले सभापति, उपसभापति दुई, सचिव दुई र सहसचिव दुई गरी ७ पदाधिकारी निर्वाचित गर्ने हुने विधानमा उल्लेख छ । कांग्रेसको क्रियाशील सदस्यता प्राप्त गरेको एक वर्ष पुगेको सदस्य मात्र गाउँपालिका-नगरपालिका वडा कार्य समितिको सभापतिको उम्मेदवार बन्न पाउने छन् । सभापतिले वडा कार्य समितिका निर्वाचित सदस्यहरूमध्येबाट एक कोषाध्यक्ष चयन गर्न पाउने व्यवस्था विधानमा छ ।

यसैगरी, ३ महिलासहित ९ जना प्रत्यक्ष निर्वाचित सदस्य, महिला, दलित, आदिवासी–जनजाति, खसआर्य, मधेसी, थारु, मुस्लिम, पिछडिएको क्षेत्रबाट ६ जना, वडाको जनसंख्याको बनोटअनुसार तोकिएबमोजिम समानुपातिक आधारमा सदस्य निर्वाचित गर्नु पर्ने विधानमा नै व्यवस्था रहेको छ ।

गाउँपालिका वडा कार्य समितिको सभापतिलाई कार्य समितिमा एक तिहाई सदस्य महिला हुनु पर्ने, समावेशी सिद्धान्त र अपांगता भएका वा अल्पसंख्यकको प्रतिनिधित्वलाई ध्यानमा राखेर क्रियाशील सदस्यमध्येबाट कार्य समितिको कूल संख्याको २० प्रतिशत सदस्य मनोनित गर्ने विधानले व्यवस्था गरेको छ ।

६ हजार ७४३ वडामा अधिवेशन सम्पन्न हुँदा ४७ हजार २०१ पदाधिकारी र एक लाख २१ हजार ६८१ सदस्यहरू निर्वाचित हुने निर्वाचन समितिले जनाएको छ । देशभरका वडाबाट मात्र एक लाख १४ हजार ५७५ क्षेत्रीय प्रतिनिधि निर्वाचित हुने निवार्चन समितिले जनाएको छ ।