काठमाडौं । जिल्ला प्रहरी कार्यालय कैलालीको फेसबुक पेजमा बुधबार पोस्ट गरियो– ‘३३ वर्षदेखि बेपत्ता व्यक्तिको उद्धार र पारिवारिक पुनर्मिलन’ । प्रहरीले तिनै लोकेन्द्रलाई आफ्नो परिवारसँग पुनर्मिलन गराए, जो ३३ वर्षदेखि वेपत्ता थिए ।

जीवितै भेट्ने आशा मारिसकेका परिवार ३३ वर्षपछि लोकेन्द्रलाई भेट्दा दंग छन् । प्रहरीको सक्रियतालाई देखेर उनका परिवार निकै खुशी छ ।
४५ सालमा मुग्लान पसेका थिए लोकेन्द्र ।

पञ्चायती ब्यवस्थाको अन्त्यतिर, २०४५ सालको कुरा हो, राजतन्त्रप्रति रुष्ट देखिने लोकेन्द्र जागीरको शिलशिलामा मुग्लान पसे ।
देशमा बसेर केही उपलब्धि हासिल गर्न नसकेपछि आर्थिक उपार्जन र परिवार सुखका लागि भन्दै भारतको सिम्लामा पुगेका उनी त्यसयता परिवारको सम्पर्कमा आएनन् ।

‘बुबा हराउँदा सायद म तीन, चार वर्षको थिए, धेरै कुरा त याद छैन तर आफन्त र घरपरिवारहरुको कुरा सुन्दा २०४५ सालमा बुवा भारतको सिम्ला जानु भएको थियो ।’–लोकेन्द्रका छोरा रामबहादुरले मेरोन्युजसँगको कुराकानीमा भने ।

बेखबर श्रीमानको खोजी गरिदिन प्रहरीमा उजुरी

भारतको सिम्ला जान्छु भनेर निस्किएका लोकेन्द्रको कुनै खबर नआएपछि उनको परिवार धेरै आत्तिए ।

घरमा ३/४ वर्षको छोरा, गर्भवती पत्नीलाई घर छाडेर हिडेका लोकेन्द्रको हप्तौंसम्म अत्तोपत्तो भएन । बेखबर श्रीमानको खोजी गरिदिन भन्दै लोकेन्द्रकी श्रीमतीले प्रहरीमा उजुरी पनि गरिन् ।

गर्भमा बच्चा बोकेर प्रहरी कार्यालयमा पटक–पटक धाएकी लोकेन्द्र पत्नी वर्षौंसम्म पनि बुढाको अत्तोपत्तो नलागेपछि निराश बनिन् ।
एक हप्ता, दुई हप्ता, तीन हप्ता गर्दागर्दै बर्षौ वित्यो तर लोकेन्द्रको कुनै खबर आएन । आफूलाई एक्लो महशुस गरी उनी लामो समयसम्म घरगृहस्थी गरेर बस्न सकिनन् ।

श्रीमानको खोजी गर्दागर्दै छोरो जन्मियो

आफूलाई एक्लो महशुश गरेकी लोकेन्द्रकी पत्नी एकैठाउँमा संघर्ष गरेर बस्न सकिनन् । गर्भवती अवस्थाकी उनलाई समाजबाट माया र स्नेह पाएको अनुभूति हुने सकेन ।

आफन्तहरुको घर चहारेर जीवन चलाउँदै आएकी उनको त्यहीबीचमा अर्को छोरो जन्मियो । दुइटा बच्चा र आफ्नो पेट पाल्न कहिले काका त कहिले मामाकोमा धाइन् ।

लोकेन्द्रका छोरा रामबहादुरले बाबु बेपत्ता भएपछिको परिवारको पीडा फेहरिस्त सुनाए । ‘बुबा वेपत्ता हुनुभएपछि हामीले जस्तो दुःख सायदै कसैले भाग्नु भएको होला । हामी आफ्नो पेट भर्नका लागि आफन्तको चाहार्नुपथ्र्यो ।’ रामबहादुरले भन्दै गए ।

आमाले भोगेको बेदनालाई सम्झिएर रामबहादुर भावुक बने । कति दिन भोकै बस्नु परेको र कति रात छानो बाहिर बिताएका दिनहरु उनलाई अहिले पनि ताजै लाग्छ । कयौं पीडाकाबीच पनि आफूहरुलाई आमाले गरेको माया पनि बिर्सन नसकिने छ रामबहादुरका लागि ।
लामो समय नफर्किएका लोकेन्द्रको खोजी गर्न उनी कहिल्यै थाकिनन् ।

कतै टुप्लुक्क आइपुग्छन् कि भनेर त कहिले चिठीपत्रको पखाईमा उनका कैंयौ दिनहरु बिते ।

भेडा चराएर दिन बित्न थाल्यो

श्रीमानको पत्ता लाग्छ कि भनी उनी प्रहरी कार्यालय पनि धाइरहिन् । हुर्किदै गएको जेठो छोरो पनि काम गर्न सक्ने भइसकेको थियो ।
लोकेन्द्रको परिवारको अवस्था देखेर एक जना दयालु भइदिँदा भेडा गोठालाको काम पाए रामबहादुरले । रामबहादुरलाई खानेबस्ने प्रबन्ध त मिल्यो तर आमा र भाइको अवस्था भने दयनीय नै रह्यो ।

आमाको दुःख देखेर सैह्य नभएपछि रामबहादुरले नै अर्को विवाह गर्न सल्लाह दिए । छोराको सल्लाहले नै उनी दोस्रो विवाह गर्न राजी भइन् । दोस्रो विवाह गरेपछि आमाले बहिनी जन्माइन् ।

वर्ष वित्दै गएपछि लोकेन्द्रलाई बिर्सनुको बिकल्प थिएन उनीहरुलाई । देशमा ठूलो द्वन्द्व भए । त्यही द्वन्द्वका क्रममा लोकेन्द्र मारिए कि भन्ने पनि परिवारले ठाने ।

अन्जान व्यक्तिले गराए पुनर्मिलन

भदौ ९ गते महानगरीय प्रहरी परिसरका प्रमुख प्रहरी वरिष्ठ उपरिक्षक (एसएसपी) अशोक सिंहको मोबाइलमा गृह मन्त्रालयबाट फोन आयो ।
लोकेन्द्र भनिने लोकुन डगौरा भारतमा फेला परेको जानकारी सिंहले गृहमन्त्रालयबाट पाए ।

भदौ ९ गते बेलुका ६ बजेतिर भारतको गयास्थित नेशनल हाइवेमा लोकेन्द्रलाई सन्दीप यादवले भेट्टाएका थिए ।

बाटोमा वेवारीसे अवस्थामा फेला परेका लोकेन्द्रलाई आफ्नै घरमा लगेर सोधपुछ गरेपछि सन्दीपले कैलालीका प्रहरी प्रमुख प्रहरी उपरीक्षक विश्व अधिकारीसँग सम्पर्क गरे । सन्दीपकै सम्पर्कबाट कैलालीका एसपी अधिकारीले लोकेन्द्रसँग कुरा गरे ।

सन्दीपले लोकेन्द्रको नेपाल प्रहरीसँग ह्वाट्सअपमा भिडियो सम्बाद गराए । ‘सन्दिप यादव मार्फत सम्पर्क स्थापित भएपछि वाट्सउप मार्फत भिडियो संवाद गरेको र संवादमा लोकेन्द्रले आफ्नो घर कैलालीको मुनुवा बताएको एसपी अधिकारीले मेरोन्यूजसँग भने ।

सोही कुराकानीकाआधारमा उनको घर तथा आफन्त पत्ता लगाउन इलाका प्रहरी कार्यालय टीकापुरबाट प्रहरी परिचालन भयो ।

घर ठेगाना र आफन्त पत्ता लागेपछि लोकुनलाई भारतीय प्रहरी र सन्दीप यादवको सहयोगमा जिल्ला प्रहरी कार्यालय पर्सा हुँदै जिल्ला प्रहरी कर्यालय कैलालीमा ल्याइयो ।

भारतीय प्रहरी र सन्दिपको सहयोगमा नेपाल ल्याइएका लोकेन्द्रलाई एसपी अधिकारीले नै परिवारको साथ लगाए ।
आफ्नो बाबुसमेत नचिनेका रामबहादुरले ३३ वर्षपछि भेट्दा दंग परेका छन् ।

कबरमा प्रयोग गरिएको तस्बिर: नेपालसमयबाट