काठमाडौँ । संखुवासभा जिल्लाको मादी नगरपालिका १ स्थित उमलिङमा एकै परिवारका ६ जनाको हत्या भएको छ । हत्यामा धारिलो हतियार प्रयोग गरिएको प्रहरीले जनाएको छ ।

जिल्ला प्रहरी कार्यालय संखुवासभाका प्रवक्ता प्रहरी निरीक्षक शुभेष अधिकारीका अनुसार हत्यामा धारिलो हतियारको प्रयोग भएको पाइएको हो । उनले भने, ‘मृतकहरूको अवस्था हेर्दा धारिलो हतियार प्रयोग भएको बुझिन्छ, के हतियार भने खुलिसकेको छैन ।’

प्रहरी चौकी मादी मुलखर्कबाट १० किलोमिटर पर रहेको र इलाका प्रहरी कार्यालय चैनपुरबाट ५५ किलोमिटर पूर्व रहेको मादी नगरपालिका १ उमलिङस्थितमा बौदमान कार्कीको घरमा हत्या भएको प्रवक्ता प्रहरी निरीक्षक शुभेष अधिकारीले मेरोन्युजलाई जानकारी दिए ।

हत्याको थप अनुसन्धाका लागि घटना स्थलतर्फ प्रहरी जाँदै गरेको जिल्ला प्रहरी कार्यालयका प्रमुख प्रहरी नायव उपरीक्षक लालध्वज सुवेदीले जानकारी दिए । उनले भने, ‘६ जनाको हत्या भएको भन्ने सूचना आएको छ, हामी जाँदै छौँ, अझै २ घण्टा लाग्न सक्छ ।’

प्रहरी चौकी मादी मुलखर्क र इलाका प्रहरी कार्यालय चैनपुरबाट खटिएको प्रहरी टोलीले घटनास्थलमा अनुसन्धान गरिरहेको छ ।

यो पनि पढ्नुहोस् : संखुवासभामा एकै परिवारका ६ जनाको हत्या (नामावालीसहित)