काठमाडौं । नेकपा (एकीकृत समाजवादी)मा समावेश हुन पाउँ भन्दै नेकपा एमालेका दुईजना संघीय सांसदले सर्वोच्च अदालतमा रिट दायर गरेका छन् ।

एमाले छाडेर माधव नेपाल नेतृत्वको एकीकृत समाजवादीतर्फ लागे पनि निर्वाचन आयोगमा सनाखत गर्न छुटेका दुई सांसदले बुधबार सर्वोच्चमा रिट दायर गरेका हुन् ।

प्रतिनिधिसभा सदस्य सोमप्रसाद पाण्डे र राष्ट्रियसभा सदस्य शारदादेवी भट्टले यसअघि आयोगको दिएको समयसीमाभित्र सनाखत गर्न छुटेका थिए । पाल्पाका पाण्डे नेकपा एकीकृत समाजवादीका अध्यक्ष माधव नेपालका सम्धीसमेत हुन् ।

दल विभाजनका लागि भदौ २ गते निर्वाचन आयोगमा पेश गरिएको हस्ताक्षरमा नाम नभएको भन्दै आयोगले उनीहरुको सनाखत गर्न अस्वीकार गरेको थियो । उनीहरुले एमालेले कारबाही गर्न नपाउने अन्तरिम आदेशकोसमेत माग गरेका छन् ।