सभामुखले बोलाए सर्वदलीय बैठक

मेरोन्यूज २०७८ भदौ २७ गते १६:२८

काठमाडौं । सभामुख अग्निप्रसाद सापकोटाले सर्वदलीय बैठक आह्वान गरेका छन् । प्रतिनिधिसभाको चालु नवौं अधिवेशनमा प्रमुख प्रतिपक्षी दल नेकपा एमालेले अवरोध गरेपछि बैठक बस्न सकेको छैन ।

सभामुख सापकोटाले सदनको गतिरोध अन्त्य गर्नका लागि सोमवार सर्वदलीय बैठक बोलाएका हुन् ।

सभामुख सापकोटाले सोमबार दिउँसो साढे २ बजेका लागि संघीय संसदमा प्रतिनिधित्व गर्ने राजनीतिक दलका अध्यक्ष प्रमुखसँग समसामयिक विषयमा छलफल गर्न सर्वदलीय बैठक आह्वान गरेको सभामुखको प्रेस संयोजक श्रीधर न्यौपानेले बताए ।

एमाले विभाजनमा सभामुखको भूमिका रहेको आरोप लगाउँदै एमालेले संसद चल्न नदिएर नाराबाजी र विरोध गर्दै आएको छ । सभामुखले माधव नेपालसहित १४ सांसदलाई पदमुक्त गरेको सूचना टाँस्नुपर्ने लगायतको माग एमालेले राख्दै आएको छ ।