काठमाडौं । प्रधानमन्त्री एवम् नेपाली काँग्रेसका सभापति शेरबहादुर देउवाले प्रतिनिधिसभा बैठक अवरुद्ध भएकोमा प्रमुख प्रतिपक्षी दल एमालेप्रति रुष्ट बनेका छन् ।

संसद बैठक लगातार अवरुद्ध भइरहेकाबेला प्रधानमन्त्री देउवाले आइतबार संचारकर्मीहरुसँग संक्षिप्त प्रतिक्रिया दिँदै संसद बैठक सुचारु कहिले हुन्छ ? भन्ने कुरा प्रमुख प्रतिपक्ष दल एमालेका अध्यक्ष केपी ओलीलाई सोध्न आग्रह गरे ।

‘प्रधानमन्त्रीज्यू, यसरी कति दिन संसद चलाउनु हुन्छ ?’ भन्ने सञ्चारकर्मीको जिज्ञासामा उनले भने,– ‘ओलीजीलाई सोध्नू’ ।

एमालेले संसदमा अवरोध गर्दै आएकाले सूचारु गराउने जिम्मा प्रमुख प्रतिपक्ष दल नेकपा (एमाले)को भएको बताए ।

प्रमुख प्रतिपक्ष दल एमालेले सभामुख अग्निप्रसाद सापकोटाले आफ्नो पार्टी फुटाउने षडयन्त्रमा प्रत्यक्ष संलग्न भएको आरोप लगाउँदै आएको छ ।

एमालेले माधवकुमार नेपालसहित १४ जना आफ्नो पार्टीले निस्काशन गरेका सांसदलाई संसद बैठकमा भाग लिन लगाएसम्म प्रतिनिधिसभा बैठक चल्न नदिने अडान लिँदै आएको छ ।

आइतबारको बैठक पनि अवरुद्ध भएपछि प्रतिनिधिसभाको अर्को बैठक आगामी भदौं २९ गते मंगलबार दिउँसो १ बजेका लागि बोलाइएको छ । सदन सूचारु गर्नेबारेमा छलफल गर्न सभामुख सापकोटाले सोमवार सर्वदलीय बैठक आह्वान गरेका छन् ।