काठमाडौँ । बारामा रहेको जगदम्बा स्टिल्स प्रा.लि.मा ग्यास चुहावट भई उद्योग परिसर बाहिर ग्याँस फैलिए पश्चात स्थानीयले तोडफोड गरेको निष्कर्ष सरकारी अध्ययन टोलीले निकालेको छ ।

भदौ ११ गते उद्योग परिसरभित्र रहेको एमोनिया ग्याँस प्लान्टको पाइपलाइनबाट ग्यास चुहावट भई उद्योग परिसर बाहिर ग्याँस फैलिएको थियो ।

भदौ २१ गते गृहमन्त्री बालकृष्ण खाणले मन्त्रीस्तरीय निर्णयबाट गठन गरेको मन्त्रालयका सहसचिव टेकराज निरौला संयोजकत्वको नौ सदस्यीय छानबिन समितिले उद्योग परिसर बाहिर ग्यास फैलिएपश्चात स्थानीय बासिन्दा आक्रोसित भइ उद्योगभित्र प्रवेश गरी तोडफोड गरेको देखिएको प्रतिवेदनमा उल्लेख गरेको छ ।

उक्त प्रतिवेदन समितिले शुक्रबार मन्त्री खाणलाई बुझाएको छ ।

ग्यास चुहावटको सूचना प्राप्त गरे पश्चात इलाका प्रहरी कार्यालय सिमराबाट खटिएका प्रहरी टोलीले तोडफोड नियन्त्रणको प्रयास गर्दा गर्दै पनि उद्योगमा स्थानीय भीडले तोडफोड गरेको व्यहोरा प्रतिवेदनमा उल्लेख भएको गृहमन्त्रालयका प्रवक्ता फणिन्द्रमणि पोखरेलले जारी गरेको विज्ञप्तिमा उल्लेख छ ।

तोडफोडमा संलग्नको पहिचान गरी कानून बमोजिम कारवाही गर्न र औद्योगिक सुरक्षाको व्यवस्था प्रभावकारी बनाउन छानबिन समितिले सुझाव दिएको छ ।

प्रतिवेदन बुझ्दै गृहमन्त्री खाणले प्राप्त सुझावहरु सम्बन्धित निकायहरुसँग समन्वय गरी कार्यान्वयन गर्न मन्त्रालयको तर्फबाट पहल गरिने बताए ।