काठमाडौं । प्रमुख प्रतिपक्षी दल नेकपा एमालेले आज पनि संसद बैठकमा नारावाजी गरेको छ । संसद बैठक शुरू हुनासाथ एमालेका सांसदहरूले नारावाजी गर्दै वेल घेराउ गरेका छन् । एमालेले कारवाही गरेका १४ सांसदलाई पदमुक्त नगरेको र सभामुखले निश्पक्ष भूमिका निर्वाह नगरेको आरोपमा एमालेले लगातार संसदमा नारावाजी गरिरहेको छ । आज पनि बैठक शुरु भएलगत्तै एमालेले त्यही श्रृंखला दोहोराउने काम गरेको थियो ।

तर सभामुख अग्नि सापकोटाले आजको बैठक पनि एमाले नारावाजीकै वीचमा सुचारु गरेका छन् ।

आजको प्रतिनिधिसभा बैठकबाट विनियोजन विधेयक पारित गर्ने र असोज १२ गतेभित्र राष्ट्रियसभाबाट पारित गरेर ‘बजेट होलिडे’ अन्त्य गर्ने सरकारको तयारी अनुरुप सरकारले आजको बैठकमा बिनियोजन विधेयक पारित गर्ने योजना बनाएको छ । त्यही कारण पनि प्रतिपक्षी दलको नारावाजीकै वीचमा सभामखुले संसदको बैठक चलाएका छन् ।

विनियोजन विधेयक २०७८ को मन्त्रालयगत शीर्षकहरूमाथि सभामुखले छलफल शुरू गराएका छन् । संसदमा दर्ता भएका संशोधन प्रस्तावहरू र विनियोजन विधेयक निर्णयार्थ पेस गरिने कार्यसूचीमा उल्लेख छ ।

अर्थमन्त्री जनार्दन शर्माले आर्थिक विधेयक र राष्ट्र ऋण उठाउने विधेयक २०७८ माथि विचार गरियोस् भन्ने प्रस्ताव पनि पेस गर्ने कार्यसूचि पनि आजको बैठकमा छ ।