काठमाडौँ । प्रधानमन्त्री शेरबहादुर देउवाको पहिलो विदेश भ्रमणको मिति घोषणा हुन बाँकी छ । तर, असोज १५ भित्रै उनी दक्षिणी छिमेकी मुलुक भारतको भ्रमणमा जाने भित्री तयारीमा जुटिसकेका छन् ।

हुन त नेपालका जो कोही प्रधानमन्त्री बने पनि अन्य देशभन्दा आफ्नै देशमा पहिलो भ्रमण गराउन भारत हतारिने गर्छ । कुनै ठोस ‘एजेण्डा’ नभए पनि नेपालका प्रधानमन्त्रीको सद्भावना भ्रमण भारतबाट गराउने भारतको भित्री चाहना सधै हुने गर्छ ।

तर, योपटक भारतले भन्दा प्रधानमन्त्री देउवाले दक्षिणी छिमेकी मुलुकको भ्रमणबाट आफ्नो औपचारिक विदेश भ्रमण शुरु गर्न हतारिएको बालुवाटार निकट स्रोतले बताएको छ । देउवाले सेप्टेम्बर अन्तिमसम्म भारत जाने तयारी थालेका छन् । त्यसका लागि उनी आफैले पहल लिन थालेका छन् । भारतले भने सेप्टेम्बरभन्दा अक्टोबरसम्ममा प्रधानमन्त्री देउवालाई भारतमा स्वागत गर्ने तयारी थालेको छ ।

सेक्टेम्बर महिना सकिन एक साता मात्रै बाँकी छ । तर, यति छोटो समयभित्रै देउवा आफै भारत जान किन हतारिदै छन् भन्ने विषयले कांग्रेसभित्र बहस सिर्जना गरेको छ । भारतीय राजदूत विनयमाेहन क्वात्रा यतिखेर दिल्लीमै छन् । उनी दिल्ली पुगेकाे १५ दिन बढी भइसक्दा पनि अझै फर्किएका छैनन् । उनको बसाइ जति लम्बिदैछ, उति नै प्रधानमन्त्री देउवाको भ्रमणको तयारीका लागि रहको बताएको छ ।

नेपालको लिम्पियाधुरासम्मको नक्साका विषयमा नेपालका प्रधानमन्त्रीले आफ्नो भारत भ्रमणका बेलामा कुरा गर्न सक्छन् ।

त्यस्तै, महाकाली नदीमा तुइन तर्दै गरेका जयसिंह धामी प्रकरणमा प्रधानमन्त्रीले भारत सरकारसँग कुरा गर्न सक्छ । सीमा क्षेत्रमा देखिएका समस्याहरू उठाउन सक्ने विषय छन् । त्यसका अतिरिक्त अन्य अर्थ राजनीतिका विषय पनि हुन सक्ने भइहाल्यो । तर, के प्रधानमन्त्री यही विषय उठाउन र भारत सरकारसँग एजेण्डा उठाउन भारत जान हतारिएका हुन् त ? तर त्यसो होइन ।

देउवाले भारत भ्रमणमा जान हतारिन खोज्नु भित्रको मक्सद खुलिसकेको छैन । तर, उनी पार्टीको आउने महाधिवेशनमा सभापति उठ्दै छन् । त्यसमा भारतको सहयोग होस् भन्ने देउवाको भित्री आकांक्षामा छन् । उनका प्रतिस्पर्धी सभापतिका उम्मेदवारहरूलाई भारतीय पक्षले ग्रिन सिंग्नल देखाएकोमा त्यसलाई क्रस गर्न उनी छिटोभन्दा छिटो भारत भ्रमणमा जान हतारिएका छन् ।

पार्टी महाधिवेशनमा केही समयपछि चापमा रहनुपर्ने भएकाले पनि देउवाले छिटै भारत भ्रमण गर्न चाहिरहेका छन् ।