काठमाडौँ । नेपाली कांग्रेसको पदाधिकारी एवं पूर्वपदाधिकारीको बैठक जारी छ । शुक्रबार बिहान साढे १० बजेदेखि सिंहदरबारस्थित कांग्रेस संसदीय दल कार्यालयमा बैठक जारी रहेको हो ।

कांग्रेस मुख्यसचिव कृष्णप्रसाद पौडेलले अहिले १४ औँ महाधिवेशनकै विषयमा छलफल भइरहेको जानकारी दिए । बिहीबारको बैठकमा महाधिवेशन पुसको दोस्रो सातामा गर्ने महामन्त्री पूर्णबहादुर खड्काले प्रस्ताव राखेका थिए । अहिले उक्त विषयमाथि छलफल चलिरहेको एक पदाधिकारीले जानकारी दिए ।

बिहीबार साँझ बसेको पदाधिकारी बैठकले दसैँपछि हिमाली जिल्लामा चिसो बढ्ने भएकाले असोज १८ गतेभित्र नै २१ जिल्लाको अधिवेशन सम्पन्न गर्ने निर्णयसमेत गरेको थियो । निर्वाचन समितिका सदस्य यगराज पोखरेलका अनुसार वडा अधिवेशन सकिएका ६४ जिल्लामा ९ असोजमै पालिका तहको अधिवेशन सुरु हुने छ ।

५६ जिल्लामा नगरपालिका अधिवेशन भोलि हुँदै छ । यिनै जिल्लाको प्रदेश, प्रतिनिधिसभा निर्वाचन क्षेत्र र जिल्ला अधिवेशन दसैँ र तिहारको बीचमा गर्ने कांग्रेसको तयारी छ । १२ असोजमा प्रदेशसभा क्षेत्र, १५ असोजमा प्रतिनिधिसभा निर्वाचन क्षेत्र तथा एकमात्र क्षेत्र भएका जिल्लाको अधिवेशन र १८ असोजमा दुई वा सोभन्दा बढी क्षेत्र भएका जिल्लाको अधिवेशन गर्ने कार्य तालिका छ ।

प्रदेश अधिवेशन कात्तिक १० देखि १२ गतेसम्म र केन्द्रीय महाधिवेशन आगामी मंसिर ९ देखि १३ गतेसम्म तय गरिएको छ ।