काठमाडौँ । नेपाली कांग्रेसले आज ६४ जिल्लामा पालिकास्तरीय अधिवेशन गर्ने भएको छ । संस्थापनइतर पक्षले सबै पालिकाको अधिवेशन एकै दिन गर्न माग गरे पनि ६४ जिल्लामा मात्रै अधिवेशन हुन लागेको हो । बाँकी जिल्लाको अधिवेशनसमेत असोज १८ गते गर्ने कांग्रेस पदाधिकारी बैठकले निर्णय गरेको छ ।

संस्थापनइतर पक्षले विवादित १३ जिल्लाको वडा अधिवेशन सकेर देशभर एकैपटक पालिकास्तरीय अधिवेशन गर्नु पर्ने माग राख्दै आएको थियो । संस्थापनइतरले निष्पक्ष ढंगले निर्वाचन नगराउने उद्देश्यले हिमाल, पहाड, तराईका नाममा छुट्टाछुट्टै मितिमा अधिवेशन गराउन खोजेको आरोप लगाएको छ ।

केन्द्रीय निर्वाचन समितिले भदौ २५ मा निर्वाचन कार्य तालिका संशोधन गरी असोज ५ गतेभित्र सबै वडा अधिवेशन, असोज ९ गते गाउँ तथा नगरपालिका अधिवेशन, असोज १२ गते प्रदेशसभा क्षेत्रीय अधिवेशन, असोज १५ गते प्रतिनिधिसभा निर्वाचन क्षेत्रीय अधिवेशन र एकमात्र प्रतिनिधिसभा निर्वाचन क्षेत्र भएका जिल्लाको जिल्ला अधिवेशन तथा असोज १८ गते एकभन्दा बढी निर्वाचन क्षेत्र भएका जिल्लाको जिल्ला अधिवेशन गर्ने निर्णय गरेको थियो ।

तर हिजो बसेको पदाधिकारी बैठकले कार्य तालिका संशोधन गरेपछि विरोध सुरु भएको हो ।