काठमाडौँ । प्रमुख प्रतिपक्ष दल नेकपा एमालेका सांसद परशुराम मेघी गुरुङले बजेट अध्यादेशको प्रतिस्थापन विधेयकमा कालोधनलाई सेतो बनाउने प्रावधान राखेको दाबी गरेका छन् ।

सोमबार बसेको राष्ट्रियसभाको बैठक अवरोध गर्नुअघि आफ्नो दलको तर्फबाट धारणा राख्दै सांसद गुरुङले सो विधेयकको धारा ५९ मा चिकित्सक, कलाकार, पत्रकार, खेलाडी, इञ्जिनियर, कानुन व्यवसायी, लेखा परीक्षक, लेखापढी व्यवसायी, परामर्श अभिकर्ता तथा मध्यस्तकर्ता, सेवा प्रदायकलगायत प्राकृतिक व्यक्तिले पछिल्लो ३ वर्षको आयकर आगामी फागुन मसान्तभित्र बुझाएमा सो भन्दा अगाडिको आयमा लाग्ने आयकर तथा मूल्य अभिवृद्धि कर मिनाहा हुने व्यवस्था गरिएको भन्दै आपत्ति जनाएका हुन् ।

उनले प्रतिस्थापन विधेयकमा उल्लेखित सो प्रावधान संविधानको मर्म र भावनाविपरीत रहेको, संविधानले भूत प्रभावी कानुन बनाउन नपाउने व्यवस्था गरेकाले मान्य नहुने चेतावनी दिए ।

‘प्रतिस्थापन विधेयकको सो प्रावधान संविधान विपरीत छ, हाम्रो प्रचलित कानुनअनुसार प्रतिकूल छ, यो कुरा चाहिँ बदर हुनुपर्छ, वास्तवमा हाम्रो संविधानको भाग २० को ४ को प्रावधानले के भन्छ ? भन्दा भूत प्रभावी कानुन बनाउन पाइदैन,’ उनले भने ।