काठमाडौँ । परराष्ट्रमन्त्री डा. नारायण खड्काले कोरोना भाइरस कोभिड-१९ विरुद्धको खोपको असमान वितरणले न्यून आय भएका मुलुकमा आर्थिक-सामाजिक असर पारेको बताएका छन् ।

संयुक्त राष्ट्र संघको ७६ औं महासभालाई मंगलबार बिहान अमेरिकाको न्यूयोर्कमा सम्बोधन गर्दै परराष्ट्रमन्त्री खड्काले सबैले न्यायपूर्ण र समान तरिकाले खोप पाउनुपर्ने बताए । उनले नेपाली जनतालाई कोरोना संक्रमणबाट सुरक्षित बनाउन वर्तमान सरकार प्राथमिकताका साथ लागेको बताउदै मन्त्री खड्काले आगामी ६ महिनाभित्र सबै नेपालीलाई खोप लगाइसक्ने लक्ष्य रहेको बताए ।

महासभालाई सम्बोधन गर्दै मन्त्री खड्काले अफगानिस्तानमा तालिबानको आगमन आन्तरिक विषय भएको बताए । उनले अफगानिस्तान, लिविया लगायत मुलुकको द्वन्द्व अन्तरिक विषय भएको भन्दै आपसी समझदारीमा समस्या समाधान हुने विश्वास विश्वास व्यक्त गरे । आणविक हातहतियारको होडबाजी र आतंकवाद मानव अस्तित्वको शत्रु भएको भन्दै उनले नेपालले त्यसको विरोध गर्दै आएको बताए ।