काठमाडौँ । पार्टीको नीति र विधि तय गर्न नेकपा (एमाले)को प्रथम विधान महाधिवेशन आजदेखि सुरु हुँदैछ । प्रमुख प्रतिपक्षी दल एमालेले ललितपुरको गोदावरीस्थित नवनिर्मित सनराइन सम्मेलन केन्द्रमा विधान महाधिवेशन गर्न लागेको हो ।

महाधिवेशनको उद्घाटन अपराह्न १२ः१५ बजे पार्टीका अध्यक्ष एवं पूर्वप्रधानमन्त्री केपी शर्मा ओलीले भव्य समारोहबीच गर्ने कार्यक्रम छ । आगामी मङ्सिरको दोस्रो साता पार्टीको दशौँ राष्ट्रिय महाधिवेशन तय गरेको एमालेको विधान महाधिवेशन राजनीतिक क्षेत्रमै पहिलो हो । एमालेको विसं २०७१ असारमा नवौँ महाधिवेशन भएको थियो । नवौँ महाधिवेशनबाट पारित दस्तावेज अनुसार एमालेले पहिलो पटक विधान महाधिवेशन गर्दैछ । राष्ट्रिय राजनीति र पार्टी जीवनमा देखापरेका यावत् समस्याबारे विधान महाधिवेशनमा व्यापक छलफल हुनेछ । पार्टीबाट बाहिरिएर हालै नेता माधवकुमार नेपालले नेकपा (एकीकृत समाजवादी) गठन गरेका बेला देशभरका प्रतिनिमूलक कार्यकर्ता बोलाएर प्रमुख एमालेले विधान महाधिवेशन गर्न लागेको हो ।

विधान महाधिवेशनमा ६ हजार ३ सय ४७ जना प्रतिनिधि सहभागी हुँदैछन् । देशभरबाट महाधिवेशन प्रतिनिधि ललितपुरको गोदावरीस्थित नवनिर्मित सनराइन सम्मेलन केन्द्रमा उपस्थित भइरहेका छन् । एमाले विधान महाधिवेशन आजदेखि १७ गतेसम्म सञ्चालन हुनेछ ।