काठमाडौँ । उमेर हदबन्दीका कारण अवकाश पाउन लागेका डा. आरपी विच्छाको तीन वर्ष म्याद थप्ने चलखेल सुरु भएको छ । स्वास्थ्य मन्त्री एवम् प्रधानमन्त्री शेरबहादुर देउवा पत्नी आरजु राणाको दबाबमा डा. विच्छाको तीन वर्ष समय थप्ने तयारी सुरु भएको हो ।

डा. विच्छा आगामी ६ कात्तिक उमेर हदका कारण अवकाश हुँदै थिए । उनी अहिले स्वास्थ्य सेवा विभागका निमित्त महानिर्देशक हुन् । उनलाई अहिलेका स्वास्थ्य राज्यमन्त्री उमेश श्रेष्ठले निमित्त महानिर्देशक बनाएका थिए ।

प्रधानमन्त्री पत्नी राणा र डा. विच्छाबीच गहिरो दोस्ती छ । जुन दोस्तीका कारण डा. विच्छालाई चिठ्ठा पर्ने भएको हो । डा. बिच्छालाई स्वास्थ्य सेवा ऐन २०५३ को दफा ४५ को उपदफा (२)लाई टेकेर म्याद थप गर्न मन्त्रालय स्रोत बताउँछ ।

उक्त दफाको उपदफा १ मा जुनसुकै कुरा लेखिएको भए पनि नेपाल सरकारलाई विशेषज्ञ सेवा अत्यावश्यक भएमा ६० वर्ष पूरा भई अत्यावश्यक हुने कर्मचारीलाई बढीमा तीन वर्षको अवधि थप्न सक्ने उल्लेख छ । सोही दफालाई आधार बनाएर डा. बिच्छाको म्याद थप्न लागिएको मन्त्रालय स्रोत बताउँछ ।

मन्त्रालय उच्च स्रोतका अनुसार डा. बिच्छाले स्वास्थ्य सेवामा आफ्नो विज्ञता आवश्यकता भएकाले म्याद थप गरी पाउँ भन्दै निवेदन दिएका थिए । उनको निवेदनलाई आधार बनाई मन्त्रालयले तीन वर्ष म्याद थप गर्नका लागि प्रस्ताव उठाएर मन्त्रिपरिषदमा पठाइसकेको छ ।

महामारीलाई विशेष समय मानेर कोही विज्ञको अवकाश पाउन लागेको छ भने यदि विशेषज्ञ म्याद थप गर्ने र कानूनमै उल्लेख भएको कुरामा सहजै सफल हुने अनुमान गरिएको छ ।

डा.विच्छा बालरोग विशेषज्ञ हुन् । उनी जस्ता अहिले मन्त्रालयमा थुपै्र स्वास्थ्य विज्ञहरु रहेका छन् । अहिलेको समयमा उनको विज्ञता आवश्यक नरहेको तर प्रधानमन्त्री पत्नीको दबाबमै उनलाई बनाउन लागिएको मन्त्रालयका कर्मचारीहरु बताउँछन् ।

डा. विच्छाको म्याद थपसम्बन्धी फाइल मन्त्रालयबाट मन्त्रिपरिषद् पठाएको सम्भवत आज बस्ने मन्त्रीपरिषद् बैठकले निर्णय गर्ने मन्त्रालय उच्च स्रोतले जानकारी दियो ।