काठमाडौँ । कास्कीको माछापुच्छ्रे गाउँपालिका ३ घाचोकका नेपाली कांग्रेस वडा एकाई समितिका सभापति कृष्णकुमार श्रेष्ठले बिपी स्मृति भवन निर्माणका लागि जग्गा दान गरेका छन् । घाचोकमा निर्माण हुने भवनका लागि उनले आफ्नो हक भोगमा रहेको ४० लाख मूल्य बराबरको ६ आना दुई पैसा जग्गा मालपोत कार्यालयमा गएर पार्टीका नाममा हक हस्तान्तरण गरेका हुन् ।

घाचोकको एकाइ समितिको बैठक तथा गतिविधि सञ्चालनका लागि सहज होस् भनेर जग्गा उपलब्ध गराएको श्रेष्ठले बताए । उनले भने, ‘वि.सं. २०३६ बाट म कांग्रेस पार्टीमा सक्रिय भएर लागेँ, बिपीको समाजवादबाट आकर्षित भएर कांग्रेसमा लागेर अहिलेसम्म सक्रिय छु, पार्टीलाई बलियो बनाउन जग्गा दान गरेको हुँ ।’

कांग्रेस वडा एकाई समितिले घाचोक बिपी स्मृत भवन निर्माणका लागि कामअघि सुरु गरेको छ । केही दिनअघि गण्डकी प्रदेशका मुख्यमन्त्री कृष्णचन्द्र नेपाली पोखरेलले भवनको शिलान्यास गरेका थिए ।