काठमाडौँ । नेपाली कांग्रेसका नेता रामचन्द्र पौडेलले देश विकासमा सरकारले आफ्नो क्षमता देखाउनु पर्ने बेला आएको बताएका छन् । एक कार्यक्रममा बोल्दै उनले कांग्रेस देश विकासमा लाग्नु पर्ने बताएका हुन् ।

यस्तै, पत्रकारहरूले महाधिवेशनका बारेमा सोधेको प्रश्नमा नेता पौडेलले पार्टीको क्रियाशील सदस्यता वितरणमा नै धाँधली भएको बताए । ‘पार्टीको क्रियाशील सदस्यता वितरणमा नै धाँधली भएको छ, छानबिन समितिले पार्टी कार्यालयमा बुझाएको नामावलीमा समेत तलमाथि पारिएको छ, यो जगन्य अपराध हो,’ उनले भने, ‘पार्टीभित्रको निर्वाचन प्रक्रिया स्वच्छ र निष्पक्ष र पारदर्शी हुनु पर्छ ।’

उनले आगामी मंसिरमा नै पार्टीका महाधिवेशन गर्नु पर्नेमा जोड दिए । यसैगरी प्रधानमन्त्रीसमेत रहेका पार्टी सभापति शेरबहादुर देउवाको गृह जिल्लामा भएको जिल्ला स्तरीय अधिवेशन पुनः गर्नु पर्ने बताए ।

पत्रकारसँग कुरा गर्दै उनले ‘अर्ली इलेक्सन’का बारेमा पार्टीभित्र कुनै छलफल नभएको बताउँदै गर्न नहुने धारणा व्यक्त गरे ।