प्रमुख प्रतिपक्ष दल नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले पार्टी भित्र उन्नतस्तरको एकता रहेको दावी गरेका छन् ।

पार्टीमा एमाले तेस्रो धारका नेताहरुको असन्तुष्टी र पार्टीभित्र पुनः विवाद चर्किरहेकाबेला ओलीले पार्टीभित्र उन्नतस्तरको एकता रहेको दाबी गरे । शुक्रबार मात्रै पार्टी विवाद मिलाउन भन्दै गरिएको दश बुँदे सहमति कार्यान्वयनका लागि गठित कार्यदलका संयोजक भीम रावलले राजीनामा दिएका थिए ।

शनिबार पार्टीको वडा अधिवेशनहरुको भर्चुअल रुपमा उद्घाटन गर्दै उनले उन्नत स्तरको समझदारीका साथ नै देशभरका सबै वडा अधिवेशनहरु सम्पन्न हुने विश्वास व्यक्त गरे ।

यस्तै, एमाले अध्यक्ष ओलीले अतिवृष्टिबाट पीडित नागरिकलाई तत्काल राहतको व्यवस्था गर्न सरकारसँग माग गरेका छन् ।

अध्यक्ष ओलीले बेमौसममा आएको वर्षाका कारण ज्यान गएकाहरुप्रति श्रद्धाञ्जली अर्पण गर्दै घाइतेहरुको शीघ्र स्वास्थ्यलाभको कामना समेत गरे ।

उनले वर्षात्को मारमा परेकाहरुलाई राहत दिने र उद्धार कार्यमा संलग्न पार्टीका नेता, कार्यकर्तालाई पनि धन्यवाद दिए ।

ओलीले अतिवृष्टिका कारण शनिवार हुन नसकेका वडा अधिवेशनहरु छिट्टै सम्पन्न गर्न पनि सम्बन्धित कमिटीहरुलाई निर्देशन दिएका छन् ।

यो पनि पढ्नुस्

एमालेमा १० बुँदे सम्झौतामा विवादपछि भीम रावलले दिए राजीनामा