बिर्तामोड । नेकपा (एकीकृत समाजवादी) पार्टीका उप-महासचिव जगन्नाथ खतिवडाले मदन भण्डारी र जीवराज आश्रितको हत्याको प्रसंग उठाउँदै पूर्वपार्टी नेतृत्वप्रति आशंका ब्यक्त गरेका छन् ।

झापाको बिर्तामोडमा समाजवादी प्रेस संगठनले शनिबार आयोजना गरेको पत्रकार सम्मेलनमा बोल्दै नेता खतिवडाले मदन–आश्रित हत्याको प्रमाण एमाले अध्यक्ष केपी ओलीले लुकाएको आरोप लगाए ।

प्रचार विभाग प्रमुख तथा पार्टी प्रवक्तासमेत रहेका खतिवडाले मदन आश्रित हत्याराको प्रमाण लुकाउन केपी ओलीहरु संलग्न रहेको दाबी गरे ।
‘उहाँहरूले हत्या गर्नुभयो पनि भन्दिन, हत्याको योजना बनाउनुभयो पनि भन्दिन’, ओलीले भने, ‘तर, हत्याराको प्रमाण लुकाउन उहाँहरू संलग्न हुनुहुन्छ भन्ने लाग्छ ।’

उनले मदन भण्डारी र जीवराज आश्रितको हत्यापछि केपी ओलीको नेतृत्वमा बनेको कार्यदलले अहिलेसम्म प्रतिवेदन सार्वजनिक नगरेको पनि उल्लेख गरे ।

खतिवडाले आफू शक्तिशाली प्रधानमन्त्री र मदन भण्डारीकी श्रीमति विद्या भण्डारी राष्ट्रपति हुँदासमेत हत्याराको खोजी गर्न नसकेको बताए ।

एमालेले मदन भण्डारीको नाम मात्रै बेचिरहेको तर वास्तविक सम्मान दिन नसकेको खतिवडाको आरोप थियो । उनले एमाले पार्टी कम्युनिस्ट हुन नसकेको पनि आरोप लगाएका थिए ।