काठमाडौँ । प्रधानमन्त्री शेरबहादुर देउवा एक साता लामो भ्रमणका लागि बेलायत प्रस्थान गरेका छन् । भ्रमणमा देउवासहित २० सदस्यीय प्रतिनिधिमण्डल रहेका छन् ।

स्कटल्यान्डको ग्लास्गोमा हुने जलवायु परिवर्तनसम्बन्धी राष्ट्र संघीय खाका संरचना महासन्धि (यूएनएफसीसीसी)को २६ औं सम्मेलन (कोप–२६) मा सहभागी हुन प्रधानमन्त्रीसहितको टोली बेलायत प्रस्थान गरेको हो । पाँचौपटक प्रधानमन्त्री बनेका देउवा आज बिहान कतार एयरको उडानबाट लन्डन प्रस्थान गरेका हुन् । उनी प्रधानमन्त्री बनेसँगै यो पहिलो विदेश भ्रमण हो ।

भ्रमण टोलीमा वन तथा वातावरणमन्त्री रामसहायप्रसाद यादव, गृह सचिव टेकनारायण पाण्डे, अर्थ सचिव मधुकुमार मरासिनी, परराष्ट्र सचिव भरतराज पौड्याल, ऊर्जा सचिव देवेन्द्र कार्की, वन तथा वातावरण सचिव पेमनारायण कँडेल र राष्ट्रिय योजना आयोगका सचिव केवलप्रसाद भण्डारी सहभागी छन् । यस्तै, यस्तै वन मन्त्रालयका सहसचिव राधा वाग्ले, परराष्ट्र मन्त्रालयका शिष्टाचार महापाल दुर्गाबहादुर सुवेदी, मन्त्रालयका उपसचिव रेवतीरमण पौडेल, राष्ट्रिय प्रकृति संरक्षण कोषका अध्यक्ष माधव कार्की र प्रधानमन्त्रीको निजी सचिवालयका उपसचिव जनक भट्ट पनि रहेको छन् । ​

भीआइपी सुरक्षा निर्देशिकाले तोकेको मापदण्डअनुसार सेनाका प्रमुख सेनानी प्रकाशबहादुर सिंह, नेपाल प्रहरीका डीएसपी कोमल शाह, सशस्त्र प्रहरी निरीक्षक रामहरि श्रेष्ठसहित ५ जना सुरक्षा अधिकृत र सरकारी सञ्चारमाध्यमका ३ जना पत्रकारसमेत भ्रमण टोलीमा रहेका छन् ।