काठमाडौं । भारतीय सुपरस्टार रजनीकान्त बिहीबार राति अस्पताल भर्ना भएका छन् ।

७० वर्षीय रजनीकान्तकी पत्नी लताले एक नोट जारी गर्दै उनी नियमित परीक्षणका लागि चेन्नाईको काभेरी अस्पतालमा भर्ना भएको र एक दुई दिनमा ‘डिस्चार्ज’ हुने विश्वास ब्यक्त गरेको भारतीय सञ्चार माध्यमले जनाएका छन् ।

रजनीकान्तका फ्यानहरुले उनको शीघ्र स्वास्थ्य लाभको कामना गर्दै सामाजिक सञ्जालमा पोस्ट गरेका छन् । कतिपयले रजनीकान्तलाई फिल्म अभिनय छाडेर आराम गर्ने सल्लाह दिएका छन् ।

रजनीकान्त स्वास्थ्य परीक्षणका लागि हरेक वर्ष अमेरिका जाने गरेका छन् । यस वर्ष उनी १८ जुनमा अमेरिका गएर ३ हप्ता बसेका थिए ।

अघिल्लो वर्ष भने कोरोना महामारीका कारण उनी अमेरिका जान पाएका थिएनन् । उनले सन् २०१६ मा अमेरिकामा मिर्गौला प्रत्यारोपण गराएका थिए ।