काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले न्यायालयमा देखिएको समस्याबारे गठबन्धनले छलफल गर्ने बताएका छन् । जनकपुर पुगेका उनले विमानस्थलमा पत्रकारसँग कुरा गर्दै उनले न्यायालयमा देखिएको समस्याबारे धारणा बनाउने बताएका हुन् ।

उनले गठबन्धनका नेताहरू यताउता हुँदा छलफल हुन नसकेको बताएका हुन् । ‘न्यायालयको विवाद समाधान गर्न काठमाडौं केन्द्रीत भएर हामी बैठक बसेर सामूहिक धारणा बनाउँछौं,’ उनले भने ।

यस्तै, उनले गठबन्धनमा कुनै विवाद नभएकाले ठीक ढंगले अगाडि बढिरहेको बताए । उता आजै गठबन्धनका नेकपा एकीकृत समाजवादीका अध्यक्ष माधवकुमार नेपालले वर्तमान गठबन्धन काँचो धागोले बाँधेको नभएकाले मजबुत रहेको प्रतिक्रिया दिएका थिए ।

यसैगरी विराटनगर विमानस्थलमा सञ्चारकर्मीसँग संक्षिप्त कुराकानीको क्रममा उनले प्रधानन्यायाधीश चोलेन्द्र शमशेरलाई महाअभियोग लगाउने विषयमा कुनै छलफल नभएको स्पष्ट पारेका थिए ।