काठमाडौं । कर्णाली प्रदेशका मुख्यमन्त्री महेन्द्रबहादुर शाहीले आलोपालो सरकार चलाउने सहमतिका कारण पदबाट राजीनामा दिएका छन् ।

सोमबार कर्णालीवासीको नाममा सम्बोधन गर्दै शाहीले राजीनामाको घोषणा गरेका हुन् । सत्ता साझेदार नेपाली काँग्रेससँग भएको आलोपालो सरकार चलाउने सहमतिअनुसार उनले राजीनामा दिएका छन् ।

काँग्रेस माओवादीबीच पहिलो ६ महिना शाही र बाँकी समय काँग्रेसका जीवनबहादुर शाही मुख्यमन्त्री बन्ने सहमति अनुसार महेन्द्रबहादुर मुख्यमन्त्री बनेका थिए ।

गठबन्धन फेरबदलका क्रममा भएको सहमति अनुसार आफूले इमानको राजनीति प्रस्तुत गर्दै नेपाली काँग्रेसलाई सत्ता हस्तान्तरण गर्न लागेको शाहीले बताए ।

नयाँ सरकारलाई आफ्नो र पार्टीको पूर्ण समर्थन रहेको पनि उनले सम्बोधनमा उल्लेख गरेका छन् ।

तत्कालीन नेकपा विभाजित भएपछि शाही सरकार अल्पमतमा परेपछि काँग्रेसको समर्थन र तत्कालीन एमाले ४ सांसदको फ्लोर क्रसको बलमा सरकार जोगिएको थियो । त्यतिबेला अर्थात वैशाख ३ गते ६ महिनापछि काँग्रेसलाई सत्ता हस्तान्तरण गर्ने गरी मुख्यमन्त्री शाही र काँग्रेस संसदीय दलका नेता जीवनबहादुर शाहीबीच लिखित सहमति भएको थियो ।

शाही ३ वर्ष ८ महिनापछि प्रदेशको सत्ताबाट बाहिरिएसँगै काँग्रेस संसदीय दलका नेता जीवनबहादुर शाही मुख्यमन्त्री बन्ने बाटो खुला भएको छ ।

सम्बोधनका क्रममा शाहीले सरकारले गरेका कामको लामो फेहरिस्त प्रस्तुत गर्दै अहिलेसम्म आफूलाई साथ दिने राजनीतिक दल र कर्मचारीलाई धन्यवादसमेत दिए ।