काठमाडौँ । प्रमुख प्रतिपक्ष दल नेकपा एमालेका अध्यक्ष केपी शर्मा ओलीले चाडपर्व र संस्कृतिका दृष्टिले विविधतायुक्त नेपाली समाजलाई सौहार्दपूर्ण अन्तरसम्बन्ध अझ मजबूत बनाउन छठपर्वले उल्लेखनीय भूमिका निर्वाह गर्दै आएको बताएका छन् ।

उदाउँदो सूर्यको आराधना गर्दै मनाइँने छठ पर्वका अवसरमा शुभकामना व्यक्त गर्दै अध्यक्ष ओलीले प्रागैतिहासिक कालदेखि दक्षिण एसियामा विशेष रुपमा सूर्यको उपासना गर्ने लोकसंस्कृतिले निरन्तरता पाउँदै आएको बताए ।

उनले मानव समाज कृषि युगमा प्रवेश गरेपछि कृषि उत्पादनसँग सम्बन्धित परिकारसहित सूर्यको उपासना गर्ने परम्पराका रुपमा छठ पर्व सुरु भएको बताए । छठ पर्व तराईमधेस र पहाडका नेपाली समुदायबीचको सेतुका रुपमा समेत विकसित हुँदै आएको उनले बताए ।