काठमाडौँ । प्रधानमन्त्री शेर बहादुर देउवाले पूर्वराजा ज्ञानेन्द्र शाहलाई देशमा शासन गर्ने भए चुनाव लड्न चुनौति दिएका छन् । गणेशमान स्मृति शान्ति प्रतिष्ठानले बुधबार शान्तिबाटिकामा आयोजना गरेको कार्यक्रममा बोल्दै प्रधानमन्त्री देउवाले गणतान्त्रिक शासन व्यवस्था विरुद्ध नलाग्न चुनौती दिएका हुन् ।

शाहले दसैँका अवसरमा व्यक्त गरेका अभिव्यक्तिप्रति आपत्ति जनाएका देउवाले आपत्ति जनाएका छन् । देउवाले आफू प्रजातन्त्रको पक्षमा उभिँदा तत्कालीन राजाले जेल हालेको बताए ।

उनले भने, ‘तत्कालीन राजाले मलाई जेलमा कोचेपछि नेपालमा गणतन्त्रको माहौल सुरू भयो । शासन गर्ने भए चुनाव लडेर आउनुस्, प्रजातन्त्रमा त्यो सुविधा छ । शासन व्यवस्था विरुद्ध नलाग्नुस् ।’ पूर्वराजाले दसैँमा शुभकामना दिँदै राजा र जनता मिलेरमात्र नेपालमा प्रजातन्त्र जोगिने बताएका थिए ।

देउवाले संविधानलाई सुधार्दै जाने बताए । प्रतिष्ठानले त्रिभुवन विश्वविद्यालयका प्राध्यापक खगेन्द्र भट्टराईलाई स्वर्णपदकबाट सम्मान गरेको थियो ।