काठमाडौं । ‘डाँडैमा मेला लागेछ, तिम्रो मेरो मायाको आधार, रिमझिम रिमझिम’ लगायतका चर्चित गीतका गायक कबिन्द्र श्रेष्ठले मुलपानीस्थित स्नेहा आश्रममा आफ्नो जन्मदिन मनाएका छन् ।

मंगलबार बुढानिलकण्ठस्थित निवासमै नेवारी संस्कृति अनुसार पुजासँगै मन्दिरको दर्शनपछि अनाथालयका बालबालिकासँग आफ्नो जन्मदिन मनाएका हुन् ।

गायक कबिन्द्रले जन्मदिनको अवसर पारेर मुलपानीस्थित स्नेहा आश्रमलाई ३० हजार रुपैंयाँ आर्थिक सहयोग पनि प्रदान गरे । उनले हरेक वर्षका जन्मदिनमा विभिन्न अशक्त तथा अनाथालयलाई सहयोग गर्दै प्रदान गर्दै आएको र यसपटक पनि सहयोग गरेको जानकारी गराए ।

‘मैले जन्मदिनमा मात्रै होइन अन्यबेला पनि बिभिन्न ठाउमा सहयोग गर्ने गरेको छु । यसपटक स्नेहा आश्रममा सानो सहयोग गरेको हुँ ।’ – उनले भने । स्नेहा आश्रम कलाकार सुलेमान शंकर (ईकु) ले सञ्चालन गर्दै आएका छन् ।

शुलेमानले आश्रम सञ्चालन गरेको थाहा पाउँदा आफूलाई निकै खुसी लागेको उनले बताए ।

बि.स. २०४९ सालमा पहिलो एल्बम सार्वजनिक गरेर सांगितीक क्षेत्रमा औपचारिक रुपमा प्रवेश गरेका गायक कबिन्द्रले बीचका केहिवर्ष गीत संगीतमा ब्रेक लिए पनि पछिल्लो समय सक्रिय छन् ।