काठमाडौं । नेकपा (एमाले)को आसन्न दशौं महाधिवेशनको लोगो सार्वजनिक गरिएको छ ।

महाधिवेशन मूल व्यवस्थापन कमिटीले शुक्रबार पत्रकार सम्मेलन गरेर महाधिवेशनको लोगो सार्वजनिक गरेको हो ।

महाधिवेशनको लोगोमा पृष्ठभूमिमा १० अंक रहेको छ भने सून्य अंकको अग्रभागमा सूर्य चिन्ह अंकित छ ।

एमालेको दशौं महाधिवेशन गैंडाले परिचित राष्ट्रिय निकुञ्ज क्षेत्र चितवनमा गरिने भएकाले गैंडाले पार्टीको झण्डा बोकेको बनाइएको छ ।

एमालेले महाधिवेशनका लागि चन्दा नउठाउने निर्णय गर्दै पार्टी सदस्यहरुबाट अनिवार्य लेबी उठाउने निर्णय गरेको छ ।

महाधिवेशनको लोगो सार्वजनिक गर्न आयोजित पत्रकार सम्मेलनमा पार्टीका कार्यालय सचिव शेरबहादुर तामाङले ई–सेवामार्फत् पार्टीका सबै सदस्यलाई कम्तिमा एक सय रुपैयाँ पठाउन आग्रह गरिएको बताए ।

एमालेको महाधिवेशन आगमी मंसिर १०, ११ र १२ गते चितवनमा हुँदैछ । महाधिवेशनमा १ हजार ९ सय ९९ जना प्रतिनिधिहरू सहभागी हुनेछन् ।