काठमाडौँ । पछिल्लो समय लोकप्रिय बन्दै गएको सामाजिक सञ्जाल टिकटकमा केन्द्रीत रहेर टेलिभिजन रियालिटी आउने भएको छ । शिखर नेपाल प्रा.लि.ले उत्पादन गर्न लागेको “शिखर टिकटक स्टार नेपाल रियालिटी शो २०७८” नाम राखिएको छ । यसमा अभिनय, गायन, नृत्य तथा सिर्जनात्मक प्रस्तुतिका माध्यमबाट सहभागी हुन सकिने छ ।

‘शिखर टिकटक स्टार नेपाल रियालिटी शो २०७८’ मा नेपाली चलचित्र क्षेत्रका चर्चित कलाकार गौरी मल्ल, रमेश उप्रेती तथा वर्षा सिवाकोटी शोको निर्णायकका रुपमा रहने छन् । आयोजकका अनुसार यस शोमा प्रथम हुनेलाई कार, दोस्रो हुनेलाई मोटरसाइकल र तेस्रोलाई स्कुटर उपहार प्रदान गरिने छ । साथै, उत्कृष्ट १० भित्र पर्ने प्रतिस्पर्धीलाई कम्प्युटर, क्यामेरा, टि.भी., फ्रिज, मोबाइल, घडीलगायतका उपहार प्रदान गरिने शोका निर्देशक हरि शर्माले जानकारी दिए ।

बुधबार राजधानीमा एक पत्रकार सम्मेलनमार्फत ‘शिखर टिकटक स्टार नेपाल रियालिटी शो २०७८’ बारेमा जानकारी दिइएको थियो । माननीय श्रम, रोजगार तथा सामाजिक सुरक्षा मन्त्री कृष्ण कुमार श्रेष्ठ ‘किसान’को प्रमुख आतिथ्यतामा सम्पन्न उक्त कार्यक्रममा कलाकारलाई शिखर सम्मान प्रदान गरिएको थियो । अभिनेता भुवन केसी, सरोज खनाल, वरिष्ठ चलचित्रकर्मी उद्धव पौड्याल, कलाकार पुकार भट्टराई, सन्दिप अर्याल, साहित्यकार भिष्मराज फुलारा तथा सञ्चारकर्मी सुदर्शन प्रसाद आचार्यलाई ‘शिखर सम्मान २०७८’ बाट सम्मानित गरिएको थियो ।

नेकपा एकीकृत समाजवादीका सांसद तथा श्रम, रोजगार तथा सामाजिक सुरक्षा मन्त्री रहेका श्रेष्ठलाई समेत शिखर नेपाल प्रा.लि.ले बधाई तथा सम्मान प्रदान गरेको छ । डिजिटल माध्यमलाई आत्मसाथ गर्दै आयोजना हुन लागेको ‘शिखर टिकटक स्टार नेपाल रियालिटी शो २०७८’ टेलिभिजन शो अर्थपूर्ण रहेको छ ।’ कार्यक्रममा बोल्दै मन्त्री श्रेष्ठले भने, ‘टिकटकका माध्यमबाट समाजमा नकारात्मकता कुरा मात्रै बढी प्रवाह भइरहेको भन्ने खालका तीता टिप्पणीलाई ‘शिखर टिकटक स्टार नेपाल रियालिटी शो २०७८’ तोड्ने विश्वास छ ।’

यो रियालिटी शो नाइस टेलिभिजन एचडीबाट प्रशारण हुनेछ । गायन, नृत्य, अभिनय तथा क्रियटिभ प्रस्तुति रहने भिडियो १५ सेकेण्डदेखि ३ मिनेटसम्मको हुनु पर्नेछ भने अनलाइन अडिसनको समय मंसिर मसान्तसम्म रहेको छ । टिकटकलाई कला क्षेत्रमा राम्रा प्रतिभा उत्पादन गर्ने प्लेटफर्म बनाउंन सकिन्छ भन्ने उद्देश्यका साथ कार्यक्रम आयोजना गर्न लागिएको शिखर नेपालका अध्यक्ष शेखर खनालले बताए । यो शोमा टेक प्रसाद बास्तोला निर्माताका रुपमा रहेका छन् ।