काठमाडौं । नेकपा (माओवादी केन्द्र)को विद्यार्थी संगठन अखिल (क्रान्तिकारी)को केन्द्रीय समिति १९९ सदस्यीय हुने भएको छ । राष्ट्रिय सम्मेलनअगाडि विधान सम्मेलन गरी पारित भएको केन्द्रीय पदाधिकारी तथा सदस्य संख्यामै रहेर कार्य समिति चयन गर्न पार्टीको स्थायी समिति बैठकले निर्णय गरेको छ ।

कात्तिक २३ गते बसेको नेकपा (माओवादी केन्द्र)को स्थायी कमिटी बैठकले १९९ सदस्यीय केन्द्रीय समिति बनाउने ठोस निर्णय गरेको हो ।

राष्ट्रिय सम्मेलन असोज १४ देखि १८ गतेसम्म काठमाडौँमा चलेको थियो । सम्मेलनले अध्यक्षमा पञ्चा सिंहलाई मात्र चयन गरेको छ । अन्य पदाधिकारी र केन्द्रीय समिति क्रान्तिकारीले चयन गर्न सकेको छैन । विधान सम्मेलनले पारित गरेको भन्दा बढी संख्याको पदाधिकारी र केन्द्रीय समिति बनाउने प्रयास भएपछि विवाद बढेको थियो । त्यसपछि पुरानो कार्यालय टिमलाई पछि निर्णय गर्न दिने गरी सम्मेलन अध्यक्ष मात्र चयन भएर टुंग्गिएको थियो ।

पदाधिकारीमा विशेष गरी महासचिव को बन्ने, कति संख्याको पदाधिकारी बन्ने र केन्द्रीय समिति कति बनाउने भन्नेमा चर्काे विवाद थपिएको थियो । विवाद मिलाउन ३९९ सदस्यीय केन्द्रीय समिति बनाउने र ८१ जनाको पदाधिकारीसम्म बनाउने विषयमा पनि प्रस्ताव आएपछि थप विवाद जन्मिएको थियो ।

अब पार्टीले नै १९९ सदस्यीय केन्द्रीय कमिटी बनाउनु पर्ने र पदाधिकारी लगायत सबै कमिटी तत्काल टुंग्गो लगाउनु पर्ने गरी सर्कुलर अध्यक्ष प्रचण्डले गरिसकेका छन् ।

विद्यार्थी मोर्चाको सम्मेलनमा पारित विधानअनुसार केन्द्रीय समिति १९९ सदस्य हुने गरी पदाधिकारी र सदस्यहरु छिटो चयन गर्ने, अध्यक्षले जारी गरेको परिपत्रमा उल्लेख छ ।