काठमाडौं । नेपाली कांग्रेसका सभापति शेरबहादुर देउवाले अन्य विषयमा नबोल्न केन्द्रीय नेताहरुलाई रुलिङ गरेका छन् ।

कांग्रेस केन्द्रीय कार्यसमितिको आइतबारको बैठकमा प्रधानमन्त्री एवम् सभापति देउवाले महाधिवेशनबारेमा मात्रै छलफल भएको भन्दै अन्य विषयमा नबोल्न रुलिङ गरे ।

आइतबारको बैठकमा नेता रामशरण महतले अदालतको विषयमा बोलेपछि सभापति देउवाले महाधिवेशन बाहेक अन्य बिषयमा नबोल्न रुलिङ गरेका थिए ।

महतले लामो समयदेखि न्यायालयमा आन्दोलन चर्किएर न्याय क्षेत्र नै प्रभावित भएको भन्दै त्यसबारेमा सरकार र पार्टीले निकास दिनुपर्नेमा जोड दिएका थिए ।

कांग्रेस केन्द्रीय कार्यसमिति बैठकले पार्टीको आसन्न १४ औं महाधिवेशनका लागि सातै प्रदेशमा केन्द्रीय नेताहरुलाई जिम्मेवारी तोकेको छ ।