काठमाडौं । कानून ब्यवसायीहरुले प्रधानन्यायाधीश चालेन्द्र शमशेर जबरालाई महाभियोग लगाउन दलहरुलाई गुहारेका छन् । न्यायमूर्तिहरुको निरन्तर संघर्षबाट पनि प्रधानन्यायाधीश जबरा डेग नचलेपछि उनलाई महाभियोग लगाउन कानून ब्यवसायीहरुले आग्रह गरेका हुन् ।

शुक्रवार नेपाल बार एसोसिएसनले सर्वोच्च अदालतमा गरेको धर्ना कार्यक्रमलाई सम्बोधन गर्दै वरिष्ठ अधिवक्ता तुलसी भट्टले प्रधानन्यायाधीश चोलेन्द्र शमशेर जबरालाई महाअभियोग लगाएर निष्काशन गर्न राजनीतिक दलहरुलाई आग्रह गरे ।

उनले तत्कालै प्रधानन्यायाधीश जबरालाई महाअभियोग लगाएर र निष्काशन गर्न राजनीतिक दलहरुलाई उनले आग्रह गरे ।

प्रधानन्यायाधीश भूमिगत गिरोहबाट चलेको आरोप

अधिवक्ता भट्टले प्रधानन्यायाधीश भूमिगत गिरोहबाट सञ्चालन भएको भन्दै न्यायाधीशहरुसँग गरेको सहमति पनि पालना नगर्नेतर्फ न्यायाधीशहरुलाई सचेत गराए ।

‘यो प्रधानन्यायाधीशसँग न दिमाग छ, न मन छ, न आत्मा छ । यो प्रधानन्यायाधीश भुमिगत गिरोहबाट सञ्चालित छ ।’– भट्टले भने ।
प्रधानन्यायाधीश आफ्नो विवेकले नचल्ने र बिचौलियाको माफियाहरुबाट सञ्चालित रहेको उनले आरोप लगाए । अधिवक्ता भट्टले प्रधानन्यायाधीशकाबारेमा राजनीतिक दलहरुले कुनै निर्णय लिन नसकेकोमा पनि रोष प्रकट गरे ।

‘म प्रधानमन्त्री, राजनीतिक दलका शीर्ष नेताहरु र सम्पूर्ण सांसदहरुलाई म आह्वान गर्न चाहन्छु, तपाईहरु कसको बलमा माननीय हुनुभएको छ अहिले ?’, भट्टले भने, ‘कानुन व्यवसायीले रातदिन खटेर, मुद्दा लेखेर, रातदिन बहस गरेर, अदालतमा झगडा गरेर, आफ्नो मेहनत गरेर, बिना पैसा बहस गरेको कारणले प्रतिनिधिसभा पुर्नस्थापना भएको छ ।’

संसद पुनस्र्थापना भएर नै सांसद, नेता, मन्त्री, गृहमन्त्री भएको समेत उनले बताए ।

‘बारको आन्दोलन दबाउन पदको दुरुपयोग’

बरिष्ठ अधिवक्ता बद्रीबहादुर कार्कीले प्रधानन्यायाधीश जबराले बारको आन्दोलन दबाउन पदको दुरुपयोग गरिरहेको आरोप लगाए ।

प्रधानन्यायाधीशले जनताको लागि इजलास चलाउन तयार नभएको तर दलाल, माफिया र तस्करहरुको सेवा गरिरहेको उनको आरोप छ ।

शक्तिशाली नेताहरुको मुद्दा सर्वोच्चमा रहेको र ती मुद्दालाई देखाएर नेताहरुलाई तर्साइएको कारण नेताहरु प्रधानन्यायाधीशको विरुद्धमा बोल्न नसकेको उनको भनाइ थियो ।

‘धेरै शक्तिशाली भन्ने नेताहरुको यहाँ मुद्दा रहेछ, त्यो मुद्दामा उहाँले आतंक पठाइराखेको रहेछ नेतालाई । भन्नुस् त हाम्रो कस्तो न्यायालय रहेछ ?’ – उनले प्रश्न गरे ।

नेपाल बार एसोसिएसनले प्रधानन्यायाधीश चोलेन्द्र शमशेर जबराको राजीनामा नआउञ्जेलसम्म सर्वोच्च अदालतमा धर्ना जारी राख्ने जनाएको छ ।