काठमाडौँ । नेपाली कांग्रेसका सभापति शेर बहादुर देउवाले सोमबार देशका ६० जिल्लमा हुने लागेको प्रतिनिधिसभा क्षेत्रीय अधिवेशनका लागि शुभकामना दिएका छन् । प्रधानमन्त्रीसमेत रहेका उनले अधिवेशन सफल पार्न आग्रह गर्दै शुभकामना दिएका हुन् ।

नेपाली कांग्रेसले आज प्रतिनिधि सभा क्षेत्रीय अधिवेशन गर्न बाँकी भएको जिल्लाहरूमा अधिवेशन गर्ने भएको हो । वडा, पालिका र प्रदेश सभा क्षेत्रीय अधिवेशन सकेको जिल्लामा प्रतिनिधिसभा क्षेत्रीय अधिवेशन हुने लागेको अवसरमा सभापति देउवाले शुभकामना दिँदै सफल पार्न आग्रह गरेका हुन् ।

यसअघि गत ४ गते रुपन्देही क्षेत्र नम्बर ३ मा क्षेत्रीय अधिवेशनको मतगणना चलिरहँदा पार्टीको एकअर्का समूहबीच कुटाकुट हुँदा पाँच जना घाइते भएका थिए । उक्त घटनामा वरिष्ठ नेता रामचन्द्र पौडेल समूहले देउवा समूहबाट र देउवासमूहले पौडेलसमूहबाट आक्रमण भएको आरोप लगाएका थिए ।

कांग्रेसमा एक प्रतिनिधिसभा क्षेत्रबाट २६ जना महाधिवेशन प्रतिनिधि केन्द्रमा आउने व्यवस्था छ । कांग्रेसले यसअघि १४ जिल्लामा जिल्ला अधिवेशन सम्पन्न गरिसकेको छ । यी जिल्लामा प्रतिनिधिसभा क्षेत्रीय अधिवेशन भई कार्यसमिति र प्रतिनिधिसमेतको टुंगो लागिसकेको छ ।

कांग्रेसले आज ६० जिल्लाका १४८ प्रतिनिधिसभा क्षेत्रमा अधिवेशन गर्ने भएको हो । कांग्रेसले आगामी मंसिर मंसिर २४ देखि २६ गते केन्द्रीय महाधिवेशन गर्ने भएको छ ।